L’embalse de Caliao, oxetivu del Gobiernu asturianu nel Día del Agua

Coincidiendo ayeri cola celebración del "Día del Agua, la viceconseyera de Mediu Ambiente del Principáu Belén Fernández volvió a asleyar la idea de la construcción del embalse de Caliao (Casu) como preséu básicu "p'asegurar agua de calidá, pa meyorar el caudal ecolóxicu del Nalón y pa esparder el serviciu de CADASA a toa Asturies".


La viceconseyera de Mediu Ambiente apuntó la posibilidá de qu'esta infraestructura eche a andar nun plazu de tiempu curtiu, adelantando la posibilidá de que se roble dequía poco un alcuerdu que la garantice y qu'apaute tamién les compesaciones precises.

L'embalse de Caliao ye un asuntu que lleva apaeciendo na política asturiana de manera más o menos intermitente dende siempre, anque l'enfotu del executivu autonómicu por sacar alantre, con nun tar la obra enxerta nel Plan Hidrolóxicu nacional, paez nesta ocasión más claru que n'otres. Dende'l movimientyu ecoloxista l'embalse de Caliao ye tamién ún de los grandes degorrios contra los que los conservacionistes asturianos asoleyen les sos argumentaciones más ellaboraes. Asina ye'l casu de la organización Ecoloxistes n'Acción, que diz que'l saltu de Caliao va producir, en casu de facese, un enorme impactu mediuambiental, al somorguiar n'agua un área de gran valor natural que ta declarada como Llugar d'Interés Comunitariu (LIC) y qu'amás ta enxerta na Rede Natura 2000 de la Unión Europea.

D'otra manera, los ecoloxistes dulden de la utilidá del embalse, que se plantegó de mano como una instalación pa la "dilución de caudales" utilidá qu'entienden que nun xustifica la construcción de la infraestructura y motivu pol que l'anterior Gobiernu descartó definitivamente la so construcción, esborriándolu dafechu del Plan Hidrolóxicu Nacional col preste de los grupos Socialista y d'Izquierda Unida del Congresu de los Diputaos. El Principáu defende que l'embalse va ameyorar la calidá del suministru d'agua a los conceyos del centru d'Asturies, pero los ecoloxistes camienten qu'ello nun ye preciso y que pue facese con otres soluciones alternatives.

Inda más, el grupu conservacionista denunció a últimos del branu del 2004 que l'agua de la cuenca del Nalón taba emplegándose cada vegada más pa la xeneración de corriente y menos pal consumu humanu, una utilización que taba llevando a escosar les reserves del embalse de Tañes ensin que d'ello se derivaren responsabilidaes, en cuantes que la llei retiraba dende l'añu 97 la prioridá del usu del agua embalsao pal abastecimientu humanu y dexaba que s'emplegare prioritariamente pa usos industriales.