Leganés 0 - Sporting 2

Nun partíu que nun tenía más historia que da-yos alternativa a rapazos del filial como Javi Fuego y dexar pasar el tiempu hasta qu'acabe la temporada, el Sporting marchó con otros tres puntos que ponen a los de Xixón per delantre del eternu rival na clasificación y que fain albidrar mínimes opciones d'ascensu. énte un estadiu vaciu de xente y contra un equipu que yá lo tien too iguao esti añu, el Sporting nun tuvo mayor problema pa marchar colos tres puntos de Butarque. El primer gol de Chus Bravo nuna xugada de corner yá esclarió que los d'Acebal, incluso coles baxes de Pablo Amo y Cobas, nun diba dexar escapar el trunfu. Sicasí, faltó una migaya de picardía pa marcar el segundu yá na primer parte y asina poder quedar tranquilos. Esa falta de tranquilidá notose na segunda parte, cuando'l Leganés decidió revolvese un poco y amagostó un par d'oportunidaes con Miguel Ángel y Iván Pérez, que tuvo mui cerca d'empatar. Depués del afoguín pepineru, el Sporting recompúsose y, xugando a la contra, tuvo bien d'ocasiones. Villa metió una, pero l'arbitrio anuló'l gol por un orsay un poco raru. El que nun tiró n'orsay foi Michel. El xigante acertó a marcar nel caberu minutu de partíu facirndo una xugada buena. Pena que nun s'enseñare más xugando nesi plan esta temporada.