L'aventura de los coríos de goma

Va agora doce años, en 1992, un barcu de tresporte de contenedores perdía nel Pacíficu Norte un cargamentu enforma especial: más de 29.000 coríos, esguiles, tortugues y llóndrigues de goma de los que tienen los rapacinos pa enredar con ellos na bañera. La flota d'animalinos de goma lleva d'entós p'acá faciendo un viaxe alredor del mundu que yá los llevó pel árticu y que tien de rematar d'equí a dientro poco nes costes d'Irlanda y el Reinu Uníu, anque dalgún miembru de la flota podría aprucir pel cantábricu.

La noticia parez una caxigalina, pero ello ye que Curtis Ebbesmeyer, un oceanógrafu retiráu, ta valiéndose de la flota de coríos pa investigar sobre'l comportamientu de les corrientes marines. Amás d'ayudar a conocer cuestiones como'l comportamientu de los pexes y l'estáu de les reserves de pescáu, el movimientu d'esti especial báramu de coríos tamién s'aplicó pa perfeccionar un programa que prediz la trayectoria d'un cuerpu nel agua, ayudando incluso a alcontrar calabres de merineros desapaecíos.

Evidentemente, los coríos nun lleven equipos de radio nin tresmisores qu'ayuden a saber au tan, colo que Curtis contó yá de mano cola ayuda de los fareros y equipos de llimpieza de playes de los EEUU, primer país au apaecieron los coríos, trés meses dempués de caer al agua y a 3.000 kilómetros del llugar del accidente. Anque un grupu tiró pal sur, llegando a l'altura de Hawaii, como demuestra l'apaición de dellos exemplares nestes islles, el grupu principal de coríos avanzó siempre pa contra'l norte, pasando bien d'ellos l'estrenchu de Bering hasta llegar al atlánticu y apaeciendo un bon garapiellu d'ellos en Washington, mientres qu'otru carráu d'ellos, que garró dirección sur, tien que tar llegando a Irlanda y el Reinu Uníu. Nel trayectu los coríos sufrieron enforma, y mientres que dellos pasaron pol trance de quedar xelaos, los más de los miembros del grupu perdieron color hasta esblancuñar dafechu, anque les tortuguines, de color azul, y los esguiles verdes caltienen l'apariencia orixinal

El casu ye que Curtis dedícase agora a seguir la güelga de tou bichu flotante, y incluso empreses como Nike avísenlu de cuando pierden un cargamentu na mar por si fuere d'interés. Precísamente la última foi un contenedor con más d'trenta y tres mil playeros d'esta casa que cayeron enfrente de California, anque nada en comparanza col volume de les 500.000 llates de cerveza que perdió un barcu chinu nel Atlánticu. Tolos años piérdense na mar más de diez mil contenedores cargaos de mercancía, dellos peligrosos pa la vida nel mar y otros munchos peligros flotantes que puen causar accidentes, anque'l mesmu Ebbermeyer diz que la cantidá de basoria que flota nel mar empieza a ser como pa preocupase. L'oceanógrafu diz que nesti intre hai una gran cantidá de plásticu flotando nos grandes océanos del planeta, mayormente en forma de bolses qu'acaben entrando a la cadena alimenticia. Pal científicu americanu, lo del plásticu ye incluso peor que los escapes d'aceite y gasolina, porque estos puen acabar biodegradándose, pero'l plásticu en cuenta d'ello, lo que fai ye francer en cachinos cada vegada más menudos hasta convertise en partícules del mesmu calibre del plancton, entrando a la cadena trófica pel primer escalón de la mesma.