L’avance del LIII Festival Interceltique de Lorient confirma a Rodrigo Cuevas y Silvia Quesada

Rodrigo Cuevas va repetir nel Festival Interceltique de Lorient pa llevar nesta ocasión al públicu bretón el so espectáculu ‘La romería’. La organización del certeme alredor la música de raigañu celta más importante del mundu avanzó los primeros nomes de la edición 2024, con Silvia Quesada tamién presente nes anuncies.

Los dos cantantes asturianos, que tuvieron presentes n’An Oriant nel 2022, nel añu dedicáu a Asturies, van volver l’añu qu’entra como parte de la delegación asturiana nun festival que va retrasase en feches por mor de la celebración de los Xuegos Olímpicos en París. El Gobiernu francés decidió que del 26 de xunetu al 11 d’agostu nun se pudieran celebrar eventos pola movilización de seguridá al rodiu les pruebes deportives, polo que la organización del Interceltique treslladó l’entamu de la cita al llunes 12, que se va allargar hasta’l domingu 18, perdiendo asina trés díes de festival.

Dedicáu a la mocedá de los países celtes, con un cartelu nel qu’apaez un gaiteru “andróxenu que bien podría ser galés, asturianu, bretón, escocés...”, esplicaben na presentación, la primer representación asturiana son dos de los artistes que, pola so propuesta musical, más coneuten cola xente mozo. El primeru n’actuar va ser Cuevas, que vien d’asoleyar un discu, ‘Manuel de romería’, que parte de lo tradicional p’abrazar otros soníos, como la electrónica o la música urbana, la nueche de domingu 11, viéspora de la inauguración oficial del Interceltique, a les 21 hores en Le Théâtre.

Mentes, Quesada va actuar cantando y tocando la pandereta nesi mesmu escenariu’l miércoles 14, tamién a les 21 hores, nel tercer Celtic Odysée, espectáculu musical qu’axunta a artistes de les diferentes naciones celtes. La de Tinéu participara na primer edición en representación d’Asturies xunto con José Manuel Tejedor.

Otros nomes y logu nuevu

L’avance fechu pola organización dexa otros nomes d’importancia como los bretones Matmatah, Soldat Louis y Noon, la formación estauxunidense de raigañu irlandés Cherish the Ladies, los escoceses Noon, Calum Stewart, Rura y Project Smok, o la manesa Ruth Keggin. Los billetes pa les sos actuaciones yá tán a la venta.

Otra manera, el Festival Interceltique de Lorient presenta un logu nuevu. El nomáu ‘planeta celta’, que fora símbolu per más de diez años del certame, sustitúise pol ‘corazón celta’.