L’Audiencia Nacional almite’l recursu asturianu contra la privatización de l’Autopista del Güerna

Ta acabante de facese pública la sentencia de la Sala Sesta de lo Contencioso-Alministrativo de l'Audiencia Nacional, que-y da la razón al Conseyu de Gobiernu del Principáu d'Asturies y considera que tien de siguir la tramitación del Recursu Contenciosu-Alministrativu interpuestu contra la privatización de la Empresa Nacional d'Autopistes, titular d'Aucalsa, concesionaria de la única Autopista que conecta Asturies cola meseta.

La sentencia, que tien fecha del 28 d'abril asegura que "les aseveraciones que fai el Xulgador son prematures nel trámite d'inalmisión del recursu", y añade que ye preciso "examinar si ye o nun ye procedente la refuga del requerimientu fechu pol Gobiernu del Principáu".

La sentencia obliga al Xulgáu Central de lo Contencioso Alministrativo númberu 4 a almitir el recursu interpuestu pol Gobiernu d'Asturies, y a entrar nel fondu de la cuestión p'apautar si les razones del Conseyu de Gobiernu s'axusten o non a derechu. Esti xulgáu númberu 4 foi'l qu'echó p'atrás el recursu asturianu contra la privatización d'Aucalsa, la titular de l'autopista del Val.le Güerna per aciu d'un autu que, con fecha del 31 d'avientu del 2.003, alegaba que nun esistía un interés "directu o llexítimu" por parte del Gobiernu asturianu.

ENA privatizóse en mayu del 2.003 y acabó en manes de Sacyr. La constructora más pequeña qu'entró a la puya por ENA foi la qu'ufiertó un preciu más altu pola empresa estatal d'autopistes. Sacyr-Vallehermoso fizo un grupu xunta'l BSCH, Caixanova, Caixa Galicia, Torreal y Caja el Monte, ufiertando ente toos ellos1.586 millones d'euros pola rede estatal d'autopistes de portalgu. Asturies foi la única comunidá autónoma que protestó nos tribunales pola operación, teniéndose pa ello en que, al nun haber otra rede viaria alternativa d'alta capacidá ente la meseta y la comunidá autónoma, nun podía dexase como única conexón una vía que diba ser de portalgu
pa los prósimos años.