L'Audiencia consiente col tren de bolos

La sección cuarta de la sala de lo contencioso-alministrativo de l'Audiencia Nacional anunció esta selmana la derogación de la orde del Ministeriu de Pesca que prohibió nel añu 2.002 l'emplegu del famosu "tren de bolos" l'arte de pesca qu'empleguen los barcos arrastreros y que les cofradíes asturianes denunciaron nel so día en cuantes que-yos abultaba un sistema de pesca que dañaba enforma los caladeros. La orde del Ministeriu obligaba a los arrastreros a facer una parada na xornada de seyes hores y prohibía l'usu del apareyu nes primeres 12 milles de la costa.

Los más de los arrastreros qu'empleguen el tren de bolos nel cantábricu son gallegos, concretamente 110 de 170 barcos que gasten tren de bolos proceden d'aquella comunidá, y foron los armadores gallegos los qu'encabezaron el recursu de casación contra la orde ministerial, del que se fizo cargu'l patrón mayor de la Cofradía d'A Coruña Torcuato Teixeira. L'Audiencia nacional estimó'l recursu de los armadores ateniéndose a un tracamundiu bultable del Ministeriu, que nun dio parte de la orde al Conseyu de Pesca de la UE, colo qu'esta invalídase automáticamente.

Otramiente, el recursu de los armadores tamién d'encontaba en que nun ta demostrao científicamente que'l tren de bolos seya dañín. Yá enantes de salir esta sentencia, el Ministeriu de Pesca comprometiérase a facer un estudiu pa la primavera del añu qu'entra nesti sentíu. Esti estudiu del tren de bolos va facese cásique con total seguranza n'Asturies, na vertical de Ribeseya, col barcu llaboratoriu del MAPA "Vizconde de Eza" qu'ayeri taba atracáu n'El Musel depués de facer una campaña d'estudiu d'esti mesmu caladeru.

La Conseyera de pesca y Mediu Rural, Servanda García, qu'asistió ayeri a la presentación de la campaña del "Vizconde de Eza" anunció a bordu de la nave qu'Asturies tien intención de recurrir la decisión de l'Audiencia, anque nun pudo concretar más porque "nun tenemos la sentencia y namás sabemos lo que salió en prensa" Servanda esplicó que falaren col. Ministeriu, pero nel MAPA respondieron-yos qu'ellos tampoco nun teníen la sentencia, que de momentu namás recibieren en Galicia, pero adelantó que'l Principáu va pidi-y al Ministeriu que recurra la sentencia de l'Audiencia Nacional