L'Atles Sonoru de la Llingua Asturiana preséntase en Cangas

El miércoles 5 d'ochobre va ser el día en que se faiga en Cangas del Narcea la presentación del I volume de la serie "Atles Sonoru de la Llingua Asturiana" una serie de CDs que s'asoleyen cola collaboración de l'Academia de la llingua y el Archivu de la Tradición Oral del Muséu Etnográficu del Pueblu d'Asturies de Xixón recoyendo muestres de falantes d'asturianu nes que s'espeyen toles variedaes y matices de la fala de cada llugar. El cangués y estudiosu de la tradición local Ignacio Martínez Alonso, más conocíu pol nome de Naciu-i Riguilón ye'l responsable d'esta entrega de la serie que presenta lleendes, cuentos y rellatos contaos polos falantes d'Ibias, Degaña, Cangas del Narcea, Tinéu, Ayande, Miranda y Somiedu, y dellos de los informantes que salen na grabación van tar presentes nel actu.

L'añu pasáu presentárase'l II volume de la serie, con falantes d'asturianu de los conceyos de Miranda, Grau, Tameza, Teberga y Quirós atropaos por Jesús Suárez López y Xosé "Ambás". Como n'otros númberos de la serie cada Cd acompáñase d'un llibrín con semeyes de los informantes y les trescripciones de les narraciones, que siempre destaquen pol valor idiomáticu y tamién pol conteníu narrativu, incluyendo histories d'antiguo de los sos llugares, de la vida propio o rellatos más allegaos a lo mitolóxico.