L'atentáu y el trunfu de Zapatero repercuten n'Europa

911 díes dempués del 9-11 de les Torres Ximielgues, el terrorismu islámicu atacaba n'España. L'atentáu de Madrid coincidía cola campaña electoral y güei, mientres el PP llambe les mancadures de la derrota, coincide tamién que fai un añu xustu de la famosa semeya del cume de Les Azores, onde Bush, Blair y Aznar roblaron l'alcuerdu invadir Iraq.

Ello ye que 365 díes dempués d'aquel retratu, ún de los que salíen na semeya yá nun ta en gobiernu, y vese qu'ello ye en gran parte pol preciu d'aquel retratu de Les Azores. El reblagu electoral del domingu, que-y devolvió'l gobiernu d'España al PSOE tres d'ocho años de gobiernu del PP ta repercutiendo nel mundu enteru, y mientres en Francia y Alemaña ven que va reforzase l'exe Madrid-París-Berlín, la prensa británica carga güei contra Tony Blair, al qu'encamienta que se cure en salú agora que ta a tiempu enantes de que los electores lu manden a ver la ballena pol sofitu a l'ataque n'Iraq. Asina lo espeya The Guardian nun editorial que diz "una lección brutal pa Blair".

D'otra manera, les consecuencies del atentáu de Madrid siguen ehí. Acabante de morrer la víctima 201 esta mañana, el Gobiernu español declaró énte'l conseyu de seguranza de la ONU que ta estudiando "nueves víes" d'investigación na autoría de la masacre y qu'echa-y la culpa automáticamente a ETA foi precipitao. La investigación sigue alantre, y güei diose anuncia de la detención pola Ertzaina d'un marroquí en Donostia que podía tener conocimientu de que diben facese los atentaos, mientres qu'un de los deteníos del sábadu, Jamal Zugam, pue tener rellación directa con Al Qaeda