L'asturianu va tar presente un añu más nel discursu de la manifestación del Arguyu

Celébrase esti sábadu en Xixón nun contestu d'indignación pola entrada de la ultraderecha nel gobiernu municipal de Foro y PP.

Xente LGTBI+ Astur (XEGA) entama estos díes les actividaes pol Día del Arguyu, que tien como elementu central la tradicional manifestación peles cais de la villa. Ésta va tener llugar mañana a les 18 hores, con salida de Begoña, y promete ser una de les más multitudinaries pola movilización que se ta produciendo en respuesta al alcuerdu de Foro con VOX pa la so entrada nel gobiernu a cambiu del apoyu pa la investidura como alcaldesa de Carmen Moriyón, cola que se mostró mui crítica esti coleutivu nuna nota de prensa entitulada '¿Cuánta dignidiá cuesta un sillón d'Alcaldía?'.

Un añu más, el manifiestu de la marcha va lleese n'asturianu, de lo que se va encargar Inaciu Galán. Nanús González, miembru de XEGA, va facelo en castellanu.