L'asturianu ta presente nel Instituto Cervantes de París con motivu del Día Européu de les Llingües

Vanessa Gutiérrez participa esti 26-S nun recital poéticu xunto con autores n'otros idiomes del estáu francés y español.

Esti xueves, 26 de setiembre, ye'l Día Européu de les Llingües, xornada que se vien celebrando dende'l 2001 y na que participen los 47 estamos miembros del Conseyu d'Europa. Trátase d'una celebración de la diversidá llingüística nel continente, col enfotu d'animar a les europees y europeos a conocer esa gran riqueza cultural, asina como a afalar el deprendimientu d'otros idiomes.

Numberoses instituciones súmense a esta iniciativa, casu del Instituto Cervantes. Asina, na so sede de París entama un recital poéticu baxo'l nome de 'Poesía y diversidad' onde va poder sentise l'asturianu, amás del castellano, eusquera, gallegu y catalán, y llingües del Estáu francés como'l propiu francés, el corsu o l'occitanu.

La representante asturiana desplazada a Francia ye Vanessa Gutiérrez, que va tar acompañada por Luis García Montero, Carlos Marzal, Antoni Clapés, María Reimóndez, Miren Agur Meabe, Serge Pey, Eric Fraj y Felì Travaglini. L'actu va desendolcase dende les 19.30 hores na propia sede del Instituto Cervantes en París, na cai Quentin Bauchart.

Ausente otru añu más en Bruxeles

L'añu pasáu llegaba a esti diariu dixital la información de l'ausencia del asturianu nel actu del Instituto Cervantes en Bruxeles con motivu del Día Européu de les Llingües. La situación repítese nesta ocasión, cola presencia namái de les llingües cooficiales nel eventu previstu pa les 19 hores.