L'asturianu pierde a Fierro Botas

El cura xesuita y escritor Federico Fierro Botas morrió' a última hora d'esti vienres n'accidente de coche mientres pasaba les vacaciones en Vladivostok (Rusia) como avezaba a facer tolos años. Persona con una gran formación n'humanidaes y historia, y espertu na historia de l'antigua URSS, Fierro Botas foi tamién un gran defensor de la Llingua Asturiana, creando xunta un garapiellu d'eclesiásticos y cristianos d'Asturies el Coleutivu Manuel Fernández de Castro, una organización dende la que se fexo la torna al asturianu de dellos testos llitúrxicos ente los que rescampla'l Catecismu de la Ilesia Católica o la traducción de la Biblia. La persona de Fierro Botas nun s'escosa colos estudios rusos y asturianistes, y una estaya menos conocía de la so biografía foi la de cura obreru nos años 60, collaborando daquella con bien d'organizaciones clandestines, sobremanera na formación de los sindicalistes, un trabayu que depués quedó en forma de llibru cola so obra "La formación sindical impartida por centrales representativas en España".La so querencia por Rusia espeyose na traducción de bien d'obres d'autores clásicos rusos al asturianu, casu de la cabera obra que nos dexó "Antoloxía billingüe asturianu-rusu 1639-2000" estoyu colo más importante de la poesía rusa de toles dómines. Nesta páxina rusa hai delles semeyes de Fierro Botas en Rusia de la que presentó esti llibru.