L'asturianu ocupa les calzaes de Cangas del Narcea

La iniciativa 'Pisando sobre los nuesos raizones ḷḷiterarios' decora los pasos peoniles de Cangas del Narcea con frases n'asturianu. Los escolinos del conceyu encargáronse de facer una escoyeta de frases qu'agora pueden lleese mientres s'espera pa cruciar la cai.

En total son diez testos breves ente les 600 propuestos polos alumnos y alumnes cangueses. Dalgunos son refranes o frases populares, otros son d'autores asturianos como Miguel Rojo o Pablo Antón Marín Estrada y tamién hai espaciu pa clásicos de la lliteratura como 'El Principín'. Una perguapa iniciativa cola que los vecinos de la villa van a poder averase a la llingua asturiana mientres pasien o faen la so actividá diaria.

Les frases tán pintaes de tal manera que pueden lleese dende l'acera mientres s'espera'l pasu de la cai y, dao'l bon recibimientu, l'actividá va repetise l'añu qu'entra. 'Pisando sobre los nuesos raizones ḷḷiterarios' desendolcóse mientres la VIII Sumana de las Ḷḷetras Asturianas por iniciativa del Conceyu de Cangas al traviés del Serviciu de Normalización Ḷḷingüística y les frases escoyíes estrenáronse ayeri.