L'asturianu n’Infantil: asina ye la propuesta pa que les ampliaciones a xornada completa nun afeuten l'emplegu

Los sindicatos CC OO Enseñanza y SUATEA contemplen esta alternativa pa torgar la perda de puestos de trabayu.

La situación estraordinaria de los docentes de Llingua Asturiana en Primaria, con mayoría de medies xornaes, provoca que’l plan presentáu pola Conseyería d’Educación pueda afeutar a decenes d’emplegos. Los sindicatos ven la impartición d’asturianu n’Infantil como una de les alternatives pa torgar la perda de puestos de trabayu, anque non la única.

“Vamos plantegar dalgunes midíes pa que, amás de que se creen estes xornaes completes, nun se reduza l’emplegu”, espresa Borja Llorente, secretariu xeneral de Comisiones Obreres (CC OO) Enseñanza. “Por exemplu, una midida que se pue facer ye metelo n’Infantil”, apunta nun momentu d’estudiu del alternatives “que permitan garantizar qu’haya más places de les que paez que va haber”.

“Hai qu’esplorar toles posibilidaes al máximo. L’Alministración tien qu’empezar a ofertar más places n’Infantil y non agrupar por niveles nel casu del asturianu”, señala Nacio González, del Sindicatu Unitariu Autónomu de Trabayadores de la Enseñanza d’Asturies (SUATEA). “Los agrupamientos signifiquen reducción horaria”, añade al tiempu que cree que “empezar a impartir con normalidá n’Infantil, que nunos centros sí se fai y n’otros non, al alumnáu que lo solicita”, sería una posible y bona midida pa crear xornaes completes al aumentar la carga horariu del profesor de Llingua Asturiana.

Llorente esplica que “n’Infantil nun hai asignatures, hai trés árees. En Comunicación y Llinguaxe trabáyase la espresión en castellanu, pue trabayase n’inglés y en llingua asturiana. Pue buscase la manera de que tamién se dea una parte del área en llingua asturiana”. “Si aumentes la carga docente del profesoráu nesos centros, tanto en Primaria como en Secundaria, va dar llugar en dalgunos casos a crear nueves medies places y n’otros a completales”, rescampla.

Tamién propón midíes en zones concretes, como’l Suroccidente, onde “hai puestos que se tarden muncho en cubrir”. Esto ye, “midíes de discriminación positiva pa que la xente vía atractivo dir a Grandas o Degaña. Pue ser que, anque haya places que tengan menos xornada de la necesaria, haya que sacales a completa”, espón.

El problema, en Primaria

El plan de la Conseyería d’Educación, “que nos aseguraron que nun ye una propuesta zarrada”, apunta Llorente, pasa por reducir les medies xornaes al 50 por cientu combinando places asitiaes a menos de 15 quilómetros pa consiguir un horariu completu itinerante. Una midida que namái atopa problemes cola situación de los docentes de Llingua Asturiana, onde “hai un abusu enorme por parte de l’Alministración”, diz González, y la mengua llegaría al 76 por cientu.

“Normalizóse que l’asturianu fuesen medies xornaes y eso nin dignifica l’asignatura nin dignifica’l llabor del profesoráu, porque’l profesoráu asturianu ta condenáu a medies xornaes”, denuncia’l representante de SUATEA. “El problema ye qu’en Llingua Asturiana el 75 por cientu de la xente ta a media xornada. Ye un abusu de l’Alministración mui claru. N’otres especialidaes sólo les xubilaciones absorben les medies xornaes que, ente comines, tresformen en completa. Nun va haber cayida del emplegu”, completa Llorente.

Ye en Primaria onde más se da la precarización del emplegu, yá qu’en Secundaria nun hai una cifra tan acusada de medies xornaes. SUATEA apunta que nes dos primeres convocatories d’esti cursu hebo 140 medies xornaes, una cifra que “nun se correspuende con nenguna otra especialidá” nesta etapa educativa, y recuerda que “si la matrícula aumenta, una media ye susceptible de convertise inmediatamente nuna entera”, d’ehí tamién la importancia de promocionar l’asignatura.

“Vamos analizar pa ver realmente cuántos puestos de trabayu se pierden de xente que tea esclusivamente trabayando por Llingua Asturiana –hai xente qu’en realidá nun ta afeutada del too porque pue trabayar pa otra especialidá– y les midíes pa contrarrestalo”, afirma’l secretariu xeneral de CC OO Enseñanza. “Tamos en fase inicial, hebo muncho alarmismu. La parte bona ye que 100 van trabayar a xornada completa en total frente a 36 qu’había enantes, pero 40 o 50 persones en primera convocatoria nun pilla plaza. Hai que ver cómo se desenvuelve a lo llargo del cursu y estudialo bien too”, añade Llorente, que cree que la conseyera Lydia Espina “ta dispuesta a negociar. Creemos que se pue buscar dalgún tipu de solución”.

Dende SUATEA considera importante “llevar una postura conxunta tolos sindicatos, porque tolos sindicatos somos los que denunciamos l’abusu de les medies xornaes”, y alvierte que “nun pue pasar la reducción de les medies xornaes única y esclusivamente poles itinerancies”.

Na semeya, la conseyera Espina nuna aula d'Infantil del CP Salvador Vega Berros de Sariegu nel mes d'avientu.