L'asturianu france la convivencia nel executivu asturianu

La carta que mandare ayeri'l conseyeru de Xusticia Javier Valledor pidiéndo-y al ministru d'asuntos esteriores Miguel Ángel Moratinos que l'asturianu entrare na solicitú del gobiernu español a la UE pal reconocimientu oficial a nivel comunitariu de les llingües de la península fizo que rinchare otra vuelta la falla tectónica que nel tema de la llingua asturiana tien la convivencia del executivu asturianu.

La socialista Ana Rosa Migoya, titular de la Conseyería de Cultura que yá contradixere n'otres ocasiones más declaraciones de los sos socios de gobiernu d'IX-BPA sobre la cuestión de la llingua, entró esta vegada a la descalificación directa del conseyeru, al qu'acusó ayeri de "tresgredir la realidá del Estatutu d'autonomía" en cuantes qu'esti nun contempla la oficialidá de la llingua. Ana Rosa Migoya quexóse de que Valledor mandare la carta ensin que'l tema se tratare nunca en conseyu de gobiernu, y sorrayó que l'executivu "nun comparte" lo qu'ella entiende como una posición individual del conseyeru.

El Grupu Socialista na cámara autonómica tamién se pronunció en términos asemeyaos a la conseyera de cultura, y asina'l diputáu José Luis Montes declaró que los socialistes taben "molestos cola superficialidá cola que'l señor Valledor trata dellos temes" . montes pidió-y a Valledor que fuere "más rigorosu" y que s'atuviere a la lletra del Estatutu d'Autonomía.

Asturies.com pudo falar esta mañana col Director de la Oficina de Política Llingüística Ramón d'Andrés, quien, ensin conocer tolos términosde la polémica, declaró que "una cosa ye que'l gobiernu nun tenga prevista la oficialidá nesta llexislatura y otra mui distinta ye que hai situaciones nes qu'esta falta d'oficialidá xenera perxuicios y nun aporta negún beneficiu, como ye'l casu de les llingües oficiales na UE". D'otra manera, d'Andrés declaró que, lo mesmo que dixo esta selmana en llanes con motivu de la reunión de la Xunta de Toponimia, el Gobiernu asturianu, seya esti o otru, tendrá d'aceptar algún día la oficialidá de la llingua"