L'asturianu, en peligru d'estinción

La UNESCO celebra güei el Día Mundial de les Llingües Maternes. Esta celebración sirve de marcu pa la presentación de la edición nueva del Atles de Llingües Minorizaes, que sustitúi a la edición del añu 1.996. Nesta actualización del añu 2.002, l'Asturianu apaez como un de los idiomes en peligru d'estinción, constatando una situación pergrave pero cierta. La UNESCO apunta al raigón del problema, alvirtiendo que l'idioma ta desapaeciendo, ente otres causes, por culpa de que les xeneraciones más nueves nun tan recibiendo la escolarización apropiao, xenerando una resquiebra xeneracional que puede resultar definitiva.

La UNESCO tamién remembra que less llingües nun desapaecen namás porque nun se tomen les midíes de conservación apropiaes, sinón tamién porque tengan que convivir con idiomes agresivos, como-y pasa a l'asturianu na so desigual competencia col castellán.

La noticia yá ta xenerando rempuestes ente personalidaes d'importancia. Izquierda Xunida y l'Academia de la Llingua faense cargu de la gravedá de la noticia y alvierten que namás la oficialidá puede torgar esta situación, mientres que'l PSOE diz que lo único que puede facese de momentu ye aplicar la llei d'usu al másimo y que ya se verá más en p'alantre si pue facese más. Nel PP demuestren un desconocimientu total de la tema. El so portavoz na Xunta Xeneral, Joaquín Aréstegui, dixo que "El PP ye partidariu de conservar cualquier seña d'identidá asturiana, y una d'elles son los bables", rematando la so declaración con "La lengua asturiana, que no llingua, ye un bien a conservar, pero nun soi partidariu de qu'haya coacciones pa deprendelo. Tampoco creo que
l'asturianu desapaeza. N'Asturies nunca hubo tradición de falar l'asturianu de forma mayoritaria"

La Ventana, el programa de la Cadena SER, fixose ecu de la noticia y llevó a los micrófonos a "alguien que hablara bable", equí'l documentu.