L’asturianu, ausente nes resoluciones nel Debate de la Xunta Xeneral

Nengún grupu parlamentariu presentó propuestes rellacionaes cola defensa y desarrollu del asturianu a les conclusiones nel Debate d'Orientación Política de la Xunta Xeneral del Principáu 2004, que remató ayeri con 14 resoluciones aprebaes, 1 del PP y les otres conxuntes de PSOE y IX-BA.

L'asturianu quedó asina arrequexáu nel debate a les referencies nos discursos d'apertura d'Álvarez Areces y Noemí Martín y a una crítica del diputáu popular Joaquín Aréstegui na primer xornada del debate, cuando'l diputáu avilesín dixo que'l gobiernu de PSOE y IU/BA actuaba "con poca gana" nel tema de la llingua, acusando al executivu de nun desarrollar les posibilidaes de la llei d'usu y de facer política de "pura sonsina y de cara a la galería" cola llingua asturiana, a la que se refirió como "bable"

La Xunta Xeneral del Principáu peslló ayeri'l Debate d'orientación Política 2004 con un resultáu probe en conclusiones: de les 101 resoluciones presentaes (89 d'elles del PP), namás 14 salieron alantre. Dos cuestiones sociollaborales, la defensa del astilleru d'IZAR y el sofitu a los trabayadores de Coto Narcea foron los temes que xeneraron más consensu, mientres que los temes rellacionaos cola cultura y les artes centraron les más de les resoluciones de la cámara

Asina, una de les propuestes aprebaes por unanimidá foi la que pidía "Collaboración estrencha" cola Fundación Príncipe d'Asturies nel XXV aniversariu de los Premios Príncipe d'Asturies col oxetivu de facer d'Asturies una "capital Cultural", mientres qu'otra afalaba a "la conservación y defensa del Parque Nacional de los Picos d'Europa"

Toos votaron al favor otra propuesta sobre la promoción del Camín de Compostela con vistes al Xacobéu del añu qu'entra, mientres qu'otra propuesta aprobada afala al desarrollu de la Llei de patrimoniu. Los diputaos del PP, mui belixerantes a lo llargo de tola sesión, votaron al favor pero criticaron que se quiera desarrollar agora una llei de va yá cuatro años, pidiendo con sorna'l diputáu Juan Morales que la resolución especificare si'l desarrollu diba ser agora o a la vuelta d'otros cuatro años". Más retranca tuvo Reinerio Álvarez Saavedra al discutir la moción sobre "modelu estable de financiación pa la Universidá y accesu a los estudios en condiciones d'igualdá" de la que dixo que "énte propuestes tan candoroses lo menos que se pue facer ye abstenese". Y asina foi que la moción salió alantre cola abstención del PP.

Fuera yá de les cuestiones culturales, tolos grupos tuvieron d'alcuerdu en que la Xunta collaborare coles empreses afectaes n'aplicación del Protocolu de Kyoto n'Asturies, una midida rellacionada col mundu de la industria, mientres que l'exe de lo social, mui presente nel debate cristalizó en trés propuestes, la que pide un pactu d'estáu sobre la sostenibilidá del sistema sanitariu, la que compromete al Conseyu de Gobiernu a remitir a la Xunta Xeneral, a lo llargo del añu 2005, la Llei de Cooperación al Desarrollu y la que manda la tramitación del plan integral de la infancia 2004-2007.