L'asturianismu llora a Mori, "un exemplu pa les xeneraciones nueves"

Les reaiciones a la muerte de Francisco Alonso Mori, militante históricu del nacionalismu asturianu, foron múltiples nes xornaes últimes. Organizaciones y amigos recordaron la figura de Paco en blogues personales y redes sociales.

Ayeri tuvo llugar el funeral na capiella del tanatoriu de Los Arenales, qu'ofició Monchu'l Cura, que señaló que Mori tenía trés amores: "la muyer, los fíos y Asturies". "Amaba la so patria y la so patria yera Asturies", continuó baxo la mirada atenta de familiares y amigos, munchos venceyaos a la política y la cultura asturiana.

Les reaciones na rede na xornada d'ayeri, cuando más se divulgó la muerte de Mori, que tuvo llugar el miércoles, foron munches. Compromisu por Asturies, partíu nel que foi nes llistes nes eleiciones municipales por Uviéu nel 2011, asoleyó un comunicáu encabezáu pola frase "Paco Mori, siempre na nuesta memoria".

"Esta selmana Asturies perdió a una persona importante; importante pa la xente que vemos Asturies como un suxetu políticu y que pensamos en clave de país, importante pa la xente que defende la xusticia social y la cultura y la llingua asturiana, y tamién importante porque foi parte d’una xeneración que, tres de la muerte del dictador, atrevióse a suañar y a trabayar por una Asturies distinta, arguyosa de sí mesma y al empar abierta al mundu", afirmaba la organización nacionalista, que dende la creación de Podemos sofita esti proyeutu.

"Siempre defendió la xuntura del asturianismu políticu dende unos parámetros progresistes", recuerden dende Compromisu, "y les decepciones eleutorales nun foron nunca a valtar les sos convicciones. Anguaño, anque queda muncho por facer, gracies al trabayu de xente como Mori, munchos de los plantegamientos de los pioneros del asturianismu yá tán asumíos pol conxuntu de la sociedá asturiana".

Pa finar, los nacionalistes cataloguen a Mori de "exemplu pa les xeneraciones nueves y pa les persones que formamos Compromisu por Asturies" y comprométense a facer que Mori tea siempre "na memoria coleutiva del pueblu asturianu".

"Ún de los nuesos"

L'escritor Vicente García Oliva foi de los primeros que recordó la figura de Mori nel so blogue con una entrada mui cariñosa na que recuerda la so trayeutoria política na Unidá Nacionalista Asturiana (UNA) y que reproducimos na nuesa seición d'opinión "Llevéme siempres mui bien con él, porque tenía mui bon caráuter y munchu sentíu del humor. Cuando too aquello finó y se fue al carayu —en referencia al proyeutu de la UNA—, dexé de velu y poco más supe d’él. Agora lleo que morrió. Y vuélvenme al maxín aquelles reuniones nes qu’habia la esperanza de lluchar por una Asturies meyor,  y nes que Paco Mori siempre tenía una rempuesta intelixente y práutica a los problemes que se plantegaben. Que la tierra-y sea leve al bonu de Paco, supongo que defraudáu como tantos otros por cómo tenemos el País".

Pela so parte, David Rivas abría'l so blogue con una entrada entitulada "Perdemos a ún de los nuesos".  "Tuvi con elli por cabera vegada na xinta qu’el últimu vienres de cada mes cellebramos los miembros de la tertulia Venticincu de Mayu, onde falamos de lo divino ya humano un grupu, variable asigún posibilidaes de tiempu, d’asturianistes de idegues y pelleyos estremaos pero con una única exa central: l’amor y l’esmolecimientu por esti país. Paco yera’l veteranu pero, al empar, con un espíritu mozu, con un afoguín propiu d’un rapaz, y tamién cola sabiduría que los años-y dieran", comienza pa depués recordar pasaxes de la so vida.

"Cola muerte de Paco Mori muerre ún de los pocos nacionalistes asturianos que lo fueran yá con cierta edá. La xeneración que llevantó la bandera azul ya oru tien anguaño sesenta y tantos años, la segunda tamos acabando la cincuentena y, más lluéu, vinieran otros. Pero Mori tinía entóncenes, naquellos setenta, cuasi cincuenta años apunta Rivas que termina la entrada xunto con la despidida "amigu, compañeru, mayestru, 'sit tibi terra levis'. Alón".

Na Semeya, nun cartel electoral de les europees de 1989, Mori a la la derecha.