L'ascensu de Blas Herrero

L'empresariu asturianu Blas Herrero va camín de convertise nun de los más importantes multimillonarios del Estáu gracies a la delda que tien con elli una importante cadena de radio.


El casu ye que d'esti asturianu depende'l futuru d'un de los medios de comunicación más importantes d'España, nada menos qu'Onda Cero. A resultes d'un contratu que se demostró que yera suicida firmáu en 1996, esta gran radio débe-y 185 millones d'euros al empresariu asturianu.

La historia de Blas Herrero nos medios de comunicación entama en 1986, cuando fundó Radio Blanca, guañu de les más de setenta llicencies de radio que tien agora, pero xorrascando más nel so pasáu atopamos a un personaxe que parez sacáu d'una película americana sobre trunfadores. Ñacíu na Pola Siero, Herrero entamó la so carrera profesional como representante comercial de marques de lleche -primero d'eso anduvo repartiendo lleche col padre-. Una sociedá de comerciu esterior y una representación de la Opel que dempués-y vendió a la familia Cosmen afitaron una carrera empresarial que siguió pel mundu mediáticu.

Yera'l tiempu del PSOE en gobiernu con Felipe González y Alfonso Guerra, y dizse que foron les bones rellaciones d'Herrero col vicepresidente les que-y apurriéron delles concesiones de radio que la llegada al poder del PP diba revalorizar. Herrero creo nel 1986 Radio Blanca con otros empresarios asturianos. Dende un primer momentu, Radio Blanca emitió baxo la señal d'Onda Cero, la canal creada pola ONCE de Durán al mercar l'antigua Cadena Rato. Herrero convivió daquella col equipu directivu d'Onda Cero, de la que llegó a ser vicepresidente, pero la situación nun diba ser eternamente asina.

Tres de la llegada al poder del PP, Telefónica y el so brazu mediáticu mercaron-y a la ONCE Onda Cero. Los nuevos amos queríen afitar les emisores propiedá d'Herrero, y por ello la canal de radio controlada por Telefónica firmó nel 2001 un alcuerdu pol que l'empresariu asturianu cedía hasta l'añu 2.011 les más de setenta emisores de radio que tenía al so nome pa la creación de la radiofórmula Kiss FM. El preciu de la cesión yera variable: 18 euros más l'actualización añal del IPC por cada oyente que tuviere la radiofórmula según los datos de l'auditoría del Estudiu Xeneral de Medios (EGM). La idea yera la de crear una radiofórmula musical venceyada a una canal de radio xeneralista, repitiendo Onda Cero y Kiss FM l'esquema de la SER colos 40 Principales, y Herrero nun escatimó en medios pa xubir l'audiencia de la nueva Kiss FM. Asina, en dos años, la radiofórmula tenía 1,3 millones d'oyentes, cuando Telefónica nel momentu del contratu contaba con tener que pagar tolo más por 100.000.

L'ésitu de la radiofórmula españó-yos nes manes a los dueños que tien agora Onda Cero, que dexó la órbita de Telefónica y Antena 3 pa entrar dientro de la del grupu Planeta, que nada nun quería saber del alcuerdu con Blas Herrero. La canal sometió l'alcuerdu a arbitraxe y el resultáu del laudo arbitral cargó cola responsabilidá del alcuerdu a los anteriores accionistes d'Onda Cero, Telefónica y Antena 3. Ente ellos y ente'l restu d'accionistes tienen que pagá-y a Blas Herrero la cantidá de 185 millones d'euros. En casu de nun pagar, Herrero fadríase col control d'Onda Cero.

Lo descomanao de la cantidá facía pensar en cualquier salida pa la situación, en cuantes que la cifra a abonar paez más de lo qu'entra nel sentíu común, pero primero Telefónica, que dio anuncia de que va pagar col 25% que-y toca, y esta mesma selmana Antena 3, que a resultes de la operación va quedar con unos númberos encarnaos de 205 millones, dieron anuncia de que van cumplir colo que manda'l laudo.

Más información na Crónica de "El Mundo" y el reportaxe d'ABC
Asina recoyó la prensa'l nacimientu de Kiss FM