L'arzobispu escaez l'asturianismu de Fierro Botas

El funeral que se fizo ayeri en memoria del cura xesuita Federico Fierro Botas nun recoyó alcordanza nenguna de la so estaya como intelectual asturianista nin se dixo parte nenguna del oficiu en llingua asturiana. L'asturianu namás tuvo presencia gracies a un discursu lleíu por ún sobrín de Fierro Botas, pero'l acabante estrenar arzobispu d'Uvieu, el cántabru Carlos Osoro, dexó de llau nel so discursu toa referencia al calter asturianista de Fierro Botas, traductor de la Biblia al asturianu y destacáu defensor de la llingua. Della xente marchó del funeral enantes de qu'acabaré, mientres qu'otra xente prefirió quedar por respetu a la familia, pero al acabar l'actu, responsables de l'Academia de la Llingua Asturiana y asturianistes en xeneral dixéron-y a Carlos Osoro que quedaben malcontentos pola visión parcial que se dio del eclesiásticu y porque nun se dixere parte nenguna del oficiu n'asturianu, como sedría la lóxica voluntá del homenaxeáu. (ver noticia más abaxo)García Arias, ex-presidente de l'Academia dixo que "nun mos paez bien tener qu'aguantar xente que desconoz la nuesa cultura" El dirixente d'Izquierda Xunida Javier García Valledor, persona de creyencies cristianes, foi más allá, diciendo que "l'obispu tien de conocer el país onde vien, y si non, que pida que lu cambien de sé".Aparte del calter, según munchos asistentes al funeral, fríu y impersonal de la homilía arzobispal, hai que dicir que la nota de pésame qu'unvió l'arzobispáu namás conocese la noticia del fallecimientu n'accidente de Fierro Botas recoyía una curtia referencia a la so xera asturianista dende'l Coleutivu Manuel Fernández de Castro, anque de cuaquier manera, la másima del Coleutivu Fernández de Castro "Llingua del Pueblu, llingua de la Ilesia" nun se cumplió como-y gustare al desapaecíu Fierro Botas.