L'Arribada abre la convocatoria pa la presentación de candidatures pa los Premios Timón

Dende esti momentu y hasta'l 3 d'ochobre yá ye posible presentar candidatures pa los Premios Timón del añu 2017 qu'entreguen dende'l 2007 l'Asociación Cultural L'Arribada. Los gallardones van entregase mientres la decimosegunda edición de L'Arribada.

Nun primer momentu los destinatarios del Premiu Timón yeren los autores en llingua asturiana o eonaviego, que víen asina reconocida la so trayeutoria creativa, pa trés años depués incorporar un Timón nuevu p'autores asturianos en llingua castellana. Por último, nel 2013, creóse'l Premiu Timón de Cultura Asturiana, que valora a les asociaciones, sociedaes, fundaciones y instituciones con sede n’Asturies que tengan como fin "la conservación y promoción de la identidá cultural de nueso, y a persones con una trayeutoria valoratible nesi ámbitu".

A los gallardones lliterarios opten nesta edición aquellos escritores nacíos nel 1967 o n'años anteriores. Les candidatures, al igual qu'asocede col de Cultura Asturiana, pueden presentase nel corréu electrónicu larribada@gmail.com, tanto por parte de coleutivos o por una persona de manera individual, siempre razonando los motivos polos que'l candidatu llevería de llevar el premiu.  

Palmarés de los Timón

Los ganadores van llevar una obra del escultor y ceramista xixonés Jesús Castañón. N'ediciones anteriores éstos foron Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013), Xosé Bolado (2014), Esther Prieto (2015) y Esther García López (2016), nel casu del Premiu Timón p'autores n'asturianu o enaviego; Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013), Carmen Ruiz-Tilve (2014) Francisco García Pérez (2015) y Pilar Sánchez Vicente (2016), na estaya d'autores asturianos en castellanu; y l’Asociación Cultural Ensame Sidreru (2013), la Xunta pola Defensa de la Asturiana (2014), l’Asociación pola Recuperación de Sidros y Comedies “El Cencerru” (2015) y Ramón d'Andrés (2016), na de Cultura Asturiana.