L'arreventón d'una cubierta cuésta-y otru caxón a Fernando Alonso

L'asturianu Fernando Alonso diba camín de facer otra gran carrera nel circuitu d'Indianápolis, escenariu del Gran Premiu de los Estaos Uníos de Fórmula 1. Remontando cinco puestos n'arrancada, na que salía nuna retrasada novena plaza, Alonso mangóse terceru tres de los Ferrrari de Barrichello y Schumacher namás prendese los semáforos, pero na octava vuelta al Renault arreventába-y una cubierta cuando diba a más de 320 km/h na recta principal del circuitu. El pilotu asturianu perdió'l coche y esbarió un bon cachu, pegando contra les barreres del circuitu hasta aparar, anque ensin sufrir daños personales el pilotu. Peor foi pa Ralf Schumacher.

El pequeñu de los Schumacher tuvo un aparatosu accidente, pero l'alemán quedó trabáu en coche, precisando de l'ayuda de los servicios del circuitu pa ser a dexar el monoplaza.

Foi un Gran Premiu enforma duru pa les mecániques, y ello ye que namás 8 coches de los venti que salieron entraron en meta. Xunta los accidentes y abandonos por avería, hai que citar tamién la descalificación de J.P.Montoya, qu'abandonó la parrilla de salida por avería pa garrar el coche de repuestu. De cualquier manera, la carrera tuvo poca historia, apuntándose Michael Schumacher el trunfu per delantre de Rubens Barrichello.

Ferrari lleva ganaes toles carreres menos una esti añu y enriestra con esti trés dobletes siguíos. Tres d'ellos, a más de venti segundos, el BAR Honda de Takuma Sato, qu'esta vegada sustituyó a Jenson Button como "outsider" de la carrera. Jarno Trulli salió a flote dende lo cabero de la parrilla de salida y fizo un cuartu puestu que-y salva los trastes a Renault, mientres que'l veteranu Olivier Panis fizo un emponderable quintu puestu pa Toyota. Sestu y sétimu foron los dos McLaren, que, a falta de competitividá, agora a lo menos son a acabar carreres, dexándo-y la última plaza con derechu a puntu a Baumgartner, col modestísimu Minardi, un coche ensin presupuestu que lleva corriendo 3 años col mesmu chasis.