L’arqueóloga Carmen Ochoa rescampla’l papel de Veranes como transición ente’l mundu romanu y el medieval

El presidente asturianu Vicente Alvarez Areces y l'alcaldesa de Xixón, Paz Fernández Felgueroso asistieron ayeri xunto cola conseyera de Cultura Ana Rosa Migoya a la inauguración del centru museísticu de la Villa Romana de Veranes, que presentó la directora de les ecavaciones Carmen Fernández Ochoa.

L'arqueóloga madrileña, que lleva 10 años dedicada a les ecavaciones nel yacimientu de Xixón aseguró que la de Veranes ye la única villa escavada a fondu nel Cantábricu, y, anque esplicó qu'entovía quedaben partes del llugar por conocese, afitó la importancia del yacimientu por ser "ún de los primeros establecimientos agropecuarios llarifundistes de la dómina del baxu imperiu romanu". L'arqueóloga rellacionó la tipoloxía de la villa, estremada nuna parte particular y otra pública, cola simbolización del so poder que dempués van facer los reis asturianos, rellacionando amás de manera directa les decoraciones en mosaicos de la villa romana coles que dempués van vese na Ilesia prerrománica de Santuyano. Fernández Ochoa centró la importancia del muséu que s'inauguraba ayeri en que ye "l'espeyu de cómo muerre 'l mundu romanu y cómo naz el mundu medieval".

Acordies colos qu'atroparon los arqueólogos nes sos escavaciones, la villa de Veranes presenta trés fases de reforma y ampliación desarrollaes a lo llargo de los sieglos IV y V dempués de Cristo. Entee los oxetos que s'esponen na Villa hai cuchiellos, ayalgues, preseos, inscripciones funeraries o cacía, amás del gran mosaicu de la sala central de la casa y una maqueta que reproduz la villa nel so esplendor.

El muséu, abiertu dende güei al públicu xeneral, va tar en réxime de puertes abiertes hasta'l próximu 8 d'abril. L'horariu d'apertura, de martes a vienres, va ser de 10:00 a 17:00 hores, y los sábados, domingos y festivos de 11:00 a 18:00 hores, pesllando los llunes. Tolos díes d'apertura va haber visites guiaes de baldre, garrando un autobús que va salir de la plaza l'Institutu a les 10:30 hores.