L'archivu del puertu de San Esteban marcha cola basura

A primeros del sieglu XX, San Esteban yera'l tercer puertu más importante d'Asturies xunta Avilés y Xixón. Puerte pel que pasaba tol carbón de la cuenca del Caudal y del Ayer, San Esteban vivió una época de bayura y foi l'aniciu d'una de les sagues industriales más importantes del país, como foron la familia Fierro. Ente l'anecdotariu d'esti puertu pel que llegaben a pasar más d'un millón de tonelaes de carbón nos años 40 ta'l ser l'escenariu del prindamientu de les armes del cargueru "Turquesa" nos preparativos pa la revolución del 34.

Cola desapaicion del tráficu carboneru a últimos de los 60, San Esteban decayó rápidamente hasta convertise nuna reliquia mayuca y abndonada de la industrialización asturiana. Tolos planes del Principáu pa facer de San Esteban un puertu turísticu lleven más de diez años pasando d'un gobiernu a otru ensin llegar a facese realidá, y nestos años namás se fizo una polémica obra na barra del puertu y unos llabores mínimos pa caltener les grues del puertu, que data la más nueva de 1.935. Un paséu pela caxa vieya del tren mineru y l'encuriosamientu de los cargaderos de carbón foron les últimes meyores nun pueblu qu'agora pue perder ún de los sos activos históricos más importantes, como ye l'archivu de la Xunta del Puertu.

Según denunció l'agrupación municipal Cambio Siglo XXI nuna carta unviada a la Conseyera de Cultura, l'archivu que guarda los documentos cola historia del puertu sufre anguaño un procesu d'espoliu y destrucción de documentos que pue llevar a la desapaición de la meyor fonte documental pa poder la historia del puertu. Los representantes de Cambio Siglo XXI dan fe d'una quema de documentos va poques selmanes y denuncien que los papeles lleven tiempu tirándose sistemáticamen te a la basura, cosa que-yos choca entovía más cuando'l Principáu ta financiando agora la construcción d'un centru d'interpretación histórica del puertu. L'agrupación municipal de Cambio Siglo XXI diz que n'anterior llexislatura yá mandaron otra carta a Conseyería de Cultura pidiendo que se ficieren cargu de los documentos del Puertu de la que nun recibieron rempuesta.