“L’aplicación de la oficialidá n’Asturies ye un procesu cenciellu pola nuesa estructura organizativa”, afirma González Riaño

La Facultad de Filosofía y Letras de la Universidá Autónoma de Madrid (UAM) acueye'l I Congresu Internacional sobre la Llingua Asturiana baxo’l títulu ‘Distintividá, identidá y oficialidá’. El presidente de l’Academia de la Llingua Asturiana (ALLA), Xosé Antón González Riaño, punxo la ponencia inaugural de les xornaes.

Na so intervención ‘Lengua asturiana: la oficialidad que Asturias necesita’ esplicó que “cuando reclamamos la oficialidá de la llingua asturiana tamos invocando’l cumplimientu de la Constitución” y dexó nidio que “n’Asturies partimos de la idea de que tenemos que buscar el nuesu propiu camín pa la oficialidá de les llingües propies, adecuándose a la nuesa realidá socioeconómica y sociopolítica”. Nesi sen aseguró que “l’aplicación de la oficialidá n’Asturies ye un procesu cenciellu pola nuesa estructura organizativa”.

Sentáu na mesa xunto con Avelino Corral, profesor de la UAM y impulsor del congresu, y por Inaciu Galán, miembru del comité organizador y vocal de Rellaciones Institucionales d’Iniciativa pol Asturianu, coleutivu collaborador, González Riaño espuso que “tenemos una literatura asturiana de gran calidá pero tenemos que trabayar na so divulgación, especialmente dientro de la mocedá y tamién fuera d’Asturies. Tenemos que sofitar la música n’asturianu dientro de los medios de comunicación”.

21 intervenciones

Llueu d’esta ponencia asocediéronse delles comunicaciones a lo llargo del día, les más presenciales, anque hebo dalguna en llinia, de Gonzalo Llamedo, Alba Arias, María Turrero, Julio Villa, Francisco Xavier Frías Conde, Taresa Fernández Lorences, Isabel Álvarez Sancho, Miriam Villazón, Covadonga Lamar, Sheryl Bernardo-Hinesley y el propiu Galán, que presentó'l so llibru ‘¡Volved las manos al bable! La llingua asturiana nel franquismu’ acompañáu por Juan Carlos Moreno.. Tamién Ramón d’Andrés punxo la ponencia ‘La llingüística y les llingües minorizaes’.

Mañana va siguir el congresu con una xornada na que rescampla la conferencia ‘Lengua asturiana: tipología y poder’ de Michael Metzeltin (Universität Wien). Van completar el programa espertos de delles univarsidaes como Adrián Martínez Expósito, Cristina Bleortu, Carmen Ainoa Martínez o David Guardado, que va presentar la comunicación ‘Ideoloxíes llingüístiques y borráu del asturianu nel periodu d’entesieglos. Análisis críticu d’una nota poco conocida de Ramón Menéndez Pidal’ sobre una propuesta del filólogu d’usar l’exércitu y la escuela como ferramientes para consiguir l’abandonu del usu y el desendolcu del asturianu.

Na semeya, Galán, González Riaño y Corral.