L'anuariu de la música vuelve a facer repasu

L'añu acaba y davezu entama a facese un resumen de lo que traxo. L'Anuariu de la Música de L'Aguañaz, que se presentó na mañana d'ayeri nos locales de la SGAE n'Uviéu, fai esi repasu a l'actualidá de la musica asturiana anguaño.

Son yá cinco años con esti los que lleva la casa discos L'Aguañaz espublizando l'Anuariu de la Música asturiana. Na mañana d'ayeri Xune Elipe, responsable de L'Aguañaz, completó'l ritu de tolos años y comentó los principales conteníos de la edición d'anguaño , amás d'opinar sobre delles cuestiones de la realidá musical n'Asturies.

Elipe amosó la so satisfacción por ser quien a mantener la continuidá d'esti anuariu, "yá son cinco años lo que llevamos con esto, amás de que tamién consiguimos aumentar la paxinación, esti añu yá tien 100 páxines, y abrir cada vez más la temática de los artículos." La continuidá del proyectu xustificase.según Xune "pola gran demanda qu'hai del anuariu, esti añu sacamos 2.000 exemplares y esperemos que nun nos duren nin dos selmanes como yá pasó l'añu pasáu." No que cinca a los conteníos señaló que "trátase dende les producciones más tradicionales hasta les últimes tendencies de la música n'asturianu, amás de qu'hai dellos artículos sobre distintos aspectos de la producción musical". Equí hai que destacar artículos como'l d'Adolfo Camilo Díaz "Cómo h.oder una actividá cultural (y que te feliciten por ello)", o el de Miguel Ángel Fernández "Siempre toca revisión" onde fai una crítica a l'actual composición del catálogu musical n'Asturies.

Interesante ye tamién l'artículu del especialista en llingua asturiana Pablo Texón onde fai un estudiu del asturianu usáu por "Los Berrones" a los llargo de la so carrera musical. Texón llega a la conclusión de que'l grupu entamó usando un asturianu de la zona d'orixe del grupu, ello ye, de Tolivia, pa dir pasando adulces a gastar un asturianu más normativu. L'anuariu tamién tien un especial sobre los trenta años de Conceyu Bable dende la perspectiva musical, artículos de Xune Elipe, Carlos Rubiera y Inaciu Llope falen sobre ello.

P'acabar, l'anuariu presenta na so collecha 2004 un catálogu de les más de 40 publicaciones de música n'asturianu d'anguaño. Nesti sentíu Xune Elipe comentó que "ye un númberu altísimu de publicaciones pa ser un país d'un millón d'habitantes". Al rau d'esti datu Xune Elipe criticó la situación de la música asturiana, "tenemos una industria musical con una producción mui grande y con ciertos reblagos de profesionalización en dalgunos aspectos. Pero nun acaba de despegar, y culpa d'ello tiénenla en bona midida los medios de comunicación que nun presten atención a la música asturiana, y la falta d'una política musical dende'l gobiernu que tire pola industria musical asturiana". Per esti camín Xune reclamó "un ente televisivu públicu asturianu que visualize la música asturiana a la sociedá del país".

El cantante de Dixebra tampoco quixo marchar de los locales de SGAE d'Uviéu ensin apuntar que " Javier Vidal, responsable n'Asturies de la SGAE, namás que se digno a venir a la presentación d'un anuariu, y foi pa metenos un gol p'anunciar la creación del premiu al meyor cantar n'asturianu, gol que falló al final col resultáu llamentable que yá sabemos. Javier Vidal debería dar esplicaciones d'aquello, anque esperemos de toes maneres qu'esti añu nun se repita y la edición d'anguaño too seya normal".