Selmana de les Lletres Asturianes

L’Anuariu de la Música Asturiana 2020 denuncia “l'abandonu institucional que caracterizó tou esti tiempu de réxime autonómicu”

|
Portada del Anuariu de la Música Asturiana 2020

Con Muyeres protagonizando la portada, l’Anuariu de la Música Asturiana torna un añu más puntual a la so cita en xineru. Amás del repasu a tolo que supunxo’l 2020 no musical, con un CD con una esbilla de les creaciones asoleyaes, la espublización denuncia l’abandonu que ta viviendo’l sector por parte de les alministraciones nun editorial entituláu ‘Autoxestión & Institucionalización’.

“Resulta cafiante y cansino tener que repetir añu tres añu les mesmes idees, esixencies y acciones a los poderes públicos d'esti país, que nun acaben d'entender y valorar lo que ye y representa la música asturiana”, apunten los responsables d’esta iniciativa qu’entama Goxe Producciones nesta segunda dómina. Nesi sen recuerden “que nun falamos namás d'ociu o de hobby, facémoslo tamién d'economía, d'imaxe de país, de Marca Asturies... Pocos sectores culturales involucren a tanta xente y tan variao como'l de la nuestra música, por ello nun s'entiende l'abandonu institucional que caracterizó tou esti tiempu de réxime autonómicu”, apuntando la necesidá de combinar l’autoxestión y la institucionalización pa que la música d'espresión asturiana tenga futuru.

L’exemplu de la importancia, repercusión y calidá de la música asturiana ta na propia revista. La portada ocúpala Muyeres, col títulu ‘El poder femenín na música asturiana’, por mor d’una entrevista nel interior, a les qu’hai que sumar otres a Lisardo Lombardía y a Fruela 757.

Ente los conteníos tamién rescamplen el reportaxe entituláu ‘Crónica d'una pandemia’, onde se fala de les repercusiones qu'ésta tuvo na música asturiana; l'informe ‘Consumu dixital’, sobre cómo la música del país va adaptándose adulces a les plataformes dixitales; dos artículos sobre'l centenariu del Cancionero Musical de la Lírica Popular Asturiana d'Eduardo Martínez Torner (‘Los mayestros Torner y Benedito y la Xirandiya d'Avilés’ y ‘Un futuru musical asturianu onde lo culto beba de lo popular); y unes páxines especiales dedicaes a facer alcordanza de Celestina Ca Sanchu. L'Anuariu zárrase, como ye vezu, cola seición ‘Collecha’, onde apaecen les producciones discográfiques del añu.

Como complementu, el tradicional CD, qu’esti añu trai 19 cortes de dellos estilos, dende’l folk al rock, pasando pola canción d’autor o’l pop. José Manuel Tejedor, Felpeyu, Muyeres, L-R, Alicia Álvarez, Toli Morilla, Tania Pereira, Nacho Vegas, La Tarrancha, Desakato, Misiva o K-Nalón son dalgunos de los grupos y artistes que suenen nesti discu.

Puntos de repartu

L’Anuariu de la Música Asturiana 2020, espublización con más de venti años de vida que se financia namái con publicidá, repártese de baldre nos puntos siguientes: El Cabanón y El Cafetón (Avilés); Barrica 13 (Candás); Camping Taurán (Valdés); El Fielato (L’Entregu); La Traviesa (L’Infiestu); L’Artesana y Matteria (La Felguera); La Llocura y L’Abellugu (Mieres); La Naveta (Nava); Copistería La Semeya (Noreña); Abrelatas y El Cuévano (Siero); El Manglar y L’Esperteyu (Uviéu); la Banda Gaites Villaviciosa-El Gaitero (Villaviciosa) y Café Trisquel, Sonidópolis, La Revoltosa, La Vida Alegre, Páramo Bar y Paradiso (Xixón). Tamién se pue consultar en llinia, al igual que sentir el CD.

Contador Estadistiques