L’Anuariu 2017 llama nel so editorial a una implicación de l’Alministración pa frenar la seca creativa

Felpeyu protagoniza la portada del Anuariu de la Música Asturiana 2017, que dende esti vienres va distribuyise de baldre xunto con una esbilla musical en CD de creaciones editaes l'añu pasáu. Nel so editorial pon atención na seca creativa actual y llama a l’Alministración y a los medios públicos a implicase.

Baxo’l nome de ‘Un tiempo meyor’, esplica que “la creatividá musical asturiana ta nun momentu mui baxu: nun surden proyectos nuevos, la volatilidá de los pocos que se creen ye evidente, nun hai renovación xeneracional, les producciones discográfiques salen a cuentagotes...”. Una situación que, opinen dende l’Anuariu editáu por Goxe Producciones, se da baxo la pasividá de l’Alministración y de los medios de comunicación públicos, pola so capacidá pa da-y visibilización a los artistes y músiques que se faen anguaño nel país.

“Necesitamos que’l Gobiernu d’Asturies (conseyeríes de Cultura y d’Industria, y Dirección Xeneral de Planificación Llingüística y Normalización), ayuntamientos y RTPA s’involucren de verdá, garren la iniciativa y se pongan a trabayar”, apunta la editorial, yá que “la escena musical asturiana ye dalgo de lo meyor que podemos ufiertar como país; nun podemos resignanos y renunciar a ella. Ameritamos, como espresaben maxistralmente Llan de Cubel, un tiempu meyor”.

Siguiendo la so llinia habitual, l’Anuariu de la Música Asturiana vien cargáu de reportaxes, informes, entrevistes, crítiques, opinión, cróniques, recoyida de material y anuncies. La portada ye pa la vuelta a los estudios de grabación de Felpeyu, que nesti 2017 espublizó’l so discu nuevu, ‘Cerquina’, ufriendo nel interior de la revista una entrevista col grupu.

Tamién tienen un papel protagonista nesti númberu les muyeres col reportaxe ‘Lletres y música: un femenín poco plural’ sobre la so presencia na escena musical asturiana. Otros trabayos son ‘Una década ente los meyores’, nel que se fai un repasu a los diez años del Premiu al Meyor Cantar, y ‘Música na dómina dixital’, sobre les maneres nueves de rellacionase de les xeneraciones más moces col fechu musical.

La estaya d’entrevistes, amás de la yá nomada con Felpeyu, inclúi una con Xosé Antón Fernández ‘Ambás’ sobre los diez años de ‘Camín de cantares’, mentes que na de cróniques pue atopase un resume a la edición d’esti añu del Premiu al Meyor Cantar, asina como del I Congresu Gaites nel Mundu. Amás, l’Anuariu dexa un güecu pa un especial pol trentenu aniversariu de Dixebra.

Damián Barreiro, Xicu Ariza, Xune Elipe, Ismael Arias, Alberto Álvarez Peña, Inaciu Llope o Adolfo Camilo Díaz son dalgunes de les firmes que collaboraron esti añu na ellaboración del Anuariu, que cumple 18 años de vida y se financia con publicidá dafechu.

Presentación, el xueves

La seición ‘Collecha’ zarra un añu más l’Anuariu, que vien acompañáu d’un CD con 19 cortes de les bandes qu’asoleyaron creaciones esti añu. Asina, inclúi pieces d’Antón Menchaca, Mur, La Bonturné, Marisa Valle Roso, Felpeyu, Dixebra, Los Berrones o Misiva.

La distribución de la revista va comenzar el viernes, xornada na que tamién va ser presentada. L’actu, previstu de primeres pal xueves, va retrasase finalmente al vienres a les 19.30 hores, col uviedín Llar La Llegra (Postigu Baxu, 40) como sede y cola presencia d'Elipe, Barreiro y Ariza.