L'añu entra con impuestos

Por si nun tuviéremos abondo cola llegada del euru y el remate al alza de los precios que faen bien de comercios, l'añu 2002 estrénase pa tolos asturianos y asturianes con impuestu nuevu que vien a tasar los combustibles cola escusa de pagar la sanidá. Anque'l Gobiernu asturianu nun va aplicar -de momentu- la parte que-y correspuende, l'impuestu tasa yá la gasolina en cerca d'un duru: cuatro pesetes, que paez qu'abulten menos cuando se convierten en 2 céntimos d'euru. La medida gubernamental tien enraxonaos a dellos colectivos empresariales como taxistes y asociaciones de tresporte, pero naide nun amenazó con nenguna protesta y l'impuestu, aprebáu gracies a la mayoría absoluta del PP, entró con tola tranquilidá del mundu. L'impuestu tien tamién daqué que ver cola UE, porque l'español ye de los estaos miembros que tienen la gasolina más barato y eurupa llevaba tiempu pidiendo que lo xubieren. D'otra parte, el gas butano y la bebida alcohólico tamién vien agora tasaos con más impuestu. Por obligación de los tribunales de la UE, al butanu xúben-y el porcentaxe d'IVA del 7 al 16%. L'alcohol lleva un incrementu nel impuestu d'ente'l 5,75 y el 8% según la graduación. Inda más, los tresportes tienen tases estatales nueves xustificaes cola inversión en seguridá tres los atentaos del 11 septiembre. Los billetes de tren xuben hasta 30 céntimos a cuenta d'esto. Pa rematala, la compañía Telefónica ta acabante de xubir la cuota d'abonu al so serviciu hasta los 11,68 eurus (1942 ptes).