L’antroxu toma Asturies

Avilés y Xixón, les dos ciudaes asturianes más antroxeres, presenten a lo llargo d'estos díes programes d'actividaes. Uviéu dexa pa en pasando'l miércoles de povisa un antroxu más discretu

L'antroxu avilesín vive esta tarde'l so día grande cola celebración del famosu Descensu de la Cai Galiana, que va llenase d'esplume pa que per ella esbarien los cacharros más alloriantes nun desfile que pasa per Galiana, San Francisco y La Cámara con final en Parque Les Meanes. La cita de Galiana compleméntase cola actuación de nueche de O´Funk'illo. El martes va ser otru día importante nel programa de la fiesta más popular del conceyu, coles actuaciones de Jerónimo Granda y del brasileñu Vaudí, mientres qu'el llunes actúen "Las Niñas".

Dempués del pregón que daba aniciu al antroxu de Xixón, dedicáu anguaño al centenariu del Sporting, l'antroxu na villa de Xovellanos desarrolla un intensu programa que tien el so día grande'l llunes d'antroxu, cuando Jerónimo Granda pela tarde y los "Mojinos Escocíos", qu'actuen pela nueche na Plaza Mayor son les atracciones más importantes. Como ye tradición, la sardina entiérrase de martes nel muelle.

Uviéu retrasa l'antroxu y déxalu pa dempués del miércoles de povisa, programando actividaes pa rapacinos na redolada de la catedral a lo llargo del vienres 11 y del sábadu 12 y cola actuación de Los Berrones la nueche del vienres como ganchu pal públicu más metíu n'años.
Más información: Antroxu d'Avilés Antroxu de Xixón Antroxu d'Uviéu