L’anteproyectu de Les Escuelines nun contempla les llingües propies (pero ta abiertu’l periodu d’alegaciones)

El día 14 fina’l plazu pa presentar alegaciones al anteproyectu de ‘Lei por la que se regula la Red Autonómica de Escuelas Infantiles’, pol que s’establez el ciclu de 0 a 3 años dientro de la etapa educativa d’Infantil col nome de Les Escuelines.

La Conseyería d’Educación sacó a información pública 15 de febreru l’espediente, que recueye les aportaciones feches por ciudadanos del 13 al 27 de xineru. El documentu inclúi na so parte final l’anteproyectu, qu’afita’l nome de Les Escuelines pa la mesma pero que nun contempla la llingua materna nin la diversidá llingüística ente los sos principios rectores.

Ye nel puntu 1 del artículu 2 cuando s’establez que “la Red Autonómica de Escuelas Infantiles que se denominará ‘Les Escuelines’ la conformarán las escuelas infantiles de titularidad autonómica existentes o que puedan llegar a existir, así como aquellas de titularidad municipal que voluntariamente se integren en la red autonómica conforme a lo dispuestos en la presente ley” (nun se fai referencia al nome gallego-asturiano As Escolías pa emplegar nel occidente del país).

Nel artículu 3, ‘Principios’, establécense un total de seis puntos nos que se van fundamentar les escolines, ensin referencia nenguna al tema llingüísticu, a la llingua materna de los escolinos y escolines nin a les llingües propies d'Asturies o a la especificidá cultural asturiana. Los principios son:

• Calter educativu
• Equidá y calidá del sistema
• Conciliación familiar
• Avance hacia una ufierta pública suficiente.
• Atención a situaciones de vulnerabilidá.
• Especial interés pol mediu rural.

Entovía ye posible presentar alegaciones al mesmu, que se pueden tramitar al traviés de la web Asturies Participa. Esta selmana y la siguiente, hasta’l xueves, va tar abiertu’l plazu.