L’angula va a menos

El Principáu prepara un plan d'esplotación d'esta especie que se pesca na ría del Nalón con captures cada añu más simbóliques.

50 barcos coles sos tripulaciones y otros 58 pescadores de ribera de los puertos de San Xuan de L'Arena, Cuideiru y San Esteban trabayen na pesca de l'angula, una de les especies más cotizaes y, cada añu, mas escoses. Les críes de l'anguila déxense ver cada añu en menor númberu nes bocanes de los ríos del país, y por ello la Conseyería quier plantease un nuevu réxime d'esplotación nel que la campaña de pesca va encurtiase significativamente, pasando d'entamar a primeros d'ochobre a facelo en payares. D'otra manera, y como solución complementaria a la mengua d'ingresos, el plan d'esplotación que la Conseyería se comprometió a presentar pa primeros de setiembre, va incluyir posibles compatibilidaes cola captura d'otres especies.

La Conseyería d'Alberto vizcaino tamién va estrenchar los controles, poniendo puntos de pesu y control nes rules de Cuideiru y L'Arena y creando una figura específica de guardapesca.

La Ría del Nalón y la del Seya, son los dos núcleos onde se pesca l'angula, un productu de "delicatessen" que se cotiza a precios ente los 250-300 euros el kilu, llegando a picos de preciu en navidá de más de 400 euros. El volume de captures mengua espectacularmente dende va unos años p'acá, y asina nel 2003-2004 pasaron pela rula de L'Arena 502 kilos cuando na campaña anterior se rularen más de 1.200. Na Ría del Seya pasó otru tanto, baxando de 866 kilos nel 2002-2003 a 436 na campaña última.