L'alta tensión ¿una prioridá?

La retirada pol Tribunal Superior de la declaración d'utilidá pública pa la llínia d'alta tensión Soto-Penagos tómenla dende'l Principáu como una cuestión d'estáu. Los altos cargos de la Conseyería d'Industria dicen qu'esto ye un guelpe durísimu pal futuru desarrollu d'Asturies, afalando les tesis de Rede Eléctrica, empresa que tira la llínia y qu'agora va tardar más años en rematala al nun poder ocupar los terrenos pol procedimientu d'urxencia. El retrasu en facer la llínia ta teniendo rempuesta dende les empreses afectaes. Hidroeléctrica, qu'anunciaba que diba facer grandes inversiones en centrales nueves p'Asturies, amenaza agora con llevar les centrales pa otros llugares casu de nun facese la llínia. Los argumentos ecoloxistes y, la oposición de los movimientos vecinales contra l'acumulación de más centros de producción eléctrica nel país y l'espoxigue de les redes eléctriques tropiecen colos intereses del Gobiernu asturianu y les grandes eléctriques. En Conceyu Abiertu convidámosvos a opinar sobre la tema.