L’ALLA y l’Acadèmia Valenciana de la Llengua ponen les bases pa la firma d’un conveniu de collaboración

La Xunta de Gobiernu de l’Acadèmia Valenciana de la Llengua (AVL) visitó recién el llar social de l’Academia de la Llingua Asturiana (ALLA). Les dos instituciones intercambiaron esperiencies y punxeron les bases pa un conveniu de collaboración que van roblar nos meses vinientes.

El presidente Xosé Antón González Riaño, el secretariu Xosé Ramón Iglesias Cueva y l’ayalgueru Carlos Lastra López, xunto con Ana María Cano como vicepresidenta en funciones, recibieron la selmana pasada a la presidenta valenciana Verònica Cantó, el vicepresidente Rafael Ramos, la secretaria Inmaculada Cerdà y los vocales M. Àngles Francés y Artur Ahuir. Per dos hores punxeron en común “les singularidaes y los numberosos puntos de conexón nes sos xeres académiques, l’estáu de desenvolvimientu de la filoloxía y les polítiques llingüístiques en cada comunidá y les posibilidaes de confluyencia futura, d’alcuerdu coles esperiencies y les ferramientes que caúna de les academies punxo al algame de la otra”, comunicaron dende l’ALLA.

Nel alcuentru confirmóse l’asistencia de l’AVL al Día de les Lletres Asturianes próximu y zarraron el compromisu d'intercambiu d’espublizaciones futures de los sos servicios editoriales y de la recoyida de les principales víes d’afondamientu nel trabayu acomuñáu, cuestiones que se van concretar nun futuru conveniu de collaboración. Como xestu, Cerdà entregó a l’ALLA una edición facsimilar del ‘Llibre dels feits del rei en Jaume’.

Na semeya, a la izquierda representantes de l'ALLA y a la derecha, de l'AVL.