L’ALLA y Ecoloxistes n’Aición roblen un conveniu de collaboración

El llar de l’Academia de la Llingua Asturiana (ALLA) acoyó esti xueves un alcuentru ente’l presidente Xosé Antón González Riaño y representantes d’Ecoloxistes n’Aición. La institución académica y el coleutivu, que sofita la oficialidá de les llingües d’Astures, roblaron un conveniu de collaboración qu'aúne'l patrimoniu llingüísticu y el natural.

L’alcuerdu compromete a Ecoloxistes n’Aición n’ameyorar y caltener l’usu del asturianu nos sos llabores y actividaes diaries y en facer de la so promoción ún de los sos oxetos de trabayu. Mentanto, l’ALLA va asesora-y na traducción y correición de testos, amás de participar na formación llingüística de los ecoloxistes y nel entamu d’actividaes culturales y educatives, d’interés llingüísticu, tales como conferencies, investigaciones y espublizaciones.

“Con esta collaboración, dambes organizaciones quieren, amás, valorar y fortalecer la rellación y la conexón esistentes ente el patrimoniu cultural y llingüísticu y el patrimoniu natural y ambiental”, comunicaron. El documentu recueye d’igual forma’l sofitu d’Ecoloxistes n’Aición al procesu sociopolíticu empobináu a la oficialización de les llingües d’Asturies, comprometiéndose col so llogru efeutivu.