L’ALLA ve insuficiente'l Plan de Normalización

Na mañana de güei llunes, una representación de l'Academia de la Llingua Asturiana de la que formaben parte la so Presidenta, Ana María Cano y l'académicu de númberu Xosé Antón González Riaño, entrevistóse col Conseyeru d'Educación del Principáu d'Asturies, José Luis Iglesias Riopedre.

A lo llargo de la xunta los representantes de l'ALLA treslladáron-y al Sr. Iglesias Riopedre estremaes cuestiones que cinquen a la enseñanza del asturianu. El puntu más importante centróse na necesidá de negociar, ensin más retrasos, la especialidá de Llingua Asturiana pal profesoráu d'Educación Primaria y Secundaria qu'afitaría la posibilidá de que los profesores de Llingua Asturiana pudieren participar, n'igualdá de condiciones col restu d'especialidaes, nos concursos de tresllaos y d'oposiciones.

Ana María Cano y González Riaño, per otru llau, ficieron ver al Conseyeru la importancia que pal futuru de los estudios universitarios de Filoloxía Asturiana habría representar l'encontu del Gobiernu d'Asturies.

Otres cuestiones presentes nel orde del día fueron, por exemplu, la urxencia na espublización de los currículos de Llingua Asturiana d'Educación Infantil, Primaria y Adultos, asina como la ellaboración de materiales curriculares pa la estaya d'Educación Secundaria. Nestos temes l'entendimientu ente les dos partes caltúvose dafechu.

Tamién hubo alcuerdu según s'apunta dende l'ALLA, na conveniencia d'entamar aiciones específiques empobinaes al llogru del espardimientu escolar del asturianu nos centros privaos y concertaos, asina como na necesidá de facer un siguimientu, seriu y rigurosu, del procesu d'escolarización: cumplimientu d'horarios, asitiamientu curricular de l'asignatura, funciones de programación y evaluación, etc.

Pa finar, los representantes de l'Academia ficieron ver a Iglesias Riopedre les bultables insuficiencies del "Plan de Normalización del Asturianu". Dende l'ALLa sorrayen que'l plan tien unos conteníos que "rebaxen mesmamente l'espíritu y la lletra de la, yá de por sí percurtia, Llei d'Usu del Asturianu de 1998". Nesti sen, y otra vuelta más, la oficialidá ye, a xuiciu de la representación académica, la única garantía pa poder iguar, en sentíu estrictu, un verdaderu Plan de Normalización que faiga vidable a tolos efeutos l'usu de la llingua asturiana.