L’ALLA presenta la so propuesta pa la oficialidá

Acordies colo anunciao pola Presidenta de l'Academia de la Llingua Asturiana nel so discursu institucional del Día de les Lletres Asturianes, celebráu'l 6 de mayu pasáu nel Teatru Campoamor, l'Academia entamó la presentación de la propuesta a distintes estayes sociales como organizaciones ciudadanes, sindicatos o partíos políticos.

Anque dende l'ALLA afirmen que'l procesu d'espardimientu de la propuesta va siguir a lo llargo de la primera quincena del mes de xunetu, cuando ta previsto que la institución académica tresllade los conteníos de la citada propuesta d'alcuerdu al Gobiernu del Principáu, Gobiernu Central, Presidenta de la Xunta Xeneral y partíos políticos con representación parllamentaria ente otros organismos, ello ye qu'hasta esti momentu, según informa l'ALLA les xuntes calteníes vienen teniendo una gran acoyida, destacando'l sofitu de lossindicatos UXT, CC.OO, USO, CSI y SUATEA asina como de les opciones polítiques asturianistes contactaes pola Academia y otres organizaciones sociales que trabayen pola dignificación y oficialización de la llingua asturiana.

La propuesta d'Alcuerdu Social y Políticu sobre la Llingua y la Cultura d'Asturies, parte de cinco puntos mínimos que son el reconocimientu del asturianu como llingua co-oficial nel Estatutu d'Autonomía d'Asturies; l'afitamientu de los conteníos de la normalización y plazos na so puesta en práutica; un pautu presupuestariu, conseñando'l mínimu necesariu pa facer vidable y efeutivu l'usu social de la Llingua; la dignificación, recuperación y divulgación de la cultura asturiana (arte, folklore, etnografía, historia, música…) nel ámbitu educativu; y l'inxerimientu de l'Antropoloxía Cultural Asturiana, nel nivel que correspuenda, dientro de la Universidá d'Uviéu.

L'Academia de la Llingua Asturiana declara qu'aguarda que les perbones perspectives qu'hasta esti momentu s'acolumbren puedan confirmase coles xuntes que van caltenese nes próximes selmanes con otros organismos y que, en definitiva, l'alcuerdu pueda ser una realidá a mediu plazu.