L'ALLA prepara un diccionariu básicu de Gallego-asturianu

La Secretaría Llingüística del Navia-Eo (ALLA) vien trabayando dende va más d'un añu na ellaboración d'un Diccionariu Básicu de Gallego-Asturianu.

Los autores del proyeutu son los especialistes en gallego-asturianu Ignacio Vares, Rafael Cascudo y Xosé Miguel Suárez, toos eo-naviegos y fondos conocedores de la realidá llingüística de la fastera más occidental d'Asturies. Dende la Secretaría del Navia-Eo de l'ALLA sorráyase qu'esti diccionariu ye especialmente importante p'atender a la escolarización de la fala na Educación Primaria y Secundaria y súmase a otres iniciatives didáutiques xurdíes de la Secretaría Llingüística del Navia-Eo como son, por exemplu, la espublización de "El meu primeiro vocabulario na fala", camentáu especialmente pa los escolinos del Primer Ciclu d'Educación Primaria.

La Secretaría Llingüística del Navia-Eo ye la seición de l'Academia de la Llingua Asturiana creada pa dar cumplimientu al so mandáu estatutariu de curiar pol gallego-asturianu. Nesti sen, ta a puntu de salir el númberu 21 de la revista "Entrambasauguas", única publicación periódica de la zona en gallego-asturianu, que cunta yá con ocho años d'andadura y más de 160 artículos publicaos, firmaos por más de 60 collaboradores del Navia-Eo, amás d'otros especialistes del restu d'Asturies.