L’ALLA noma a Galán bibliotecariu de la institución, que proyeuta un archivu dixital de la lliteratura asturiana

Inaciu Galán conviértese nel primer bibliotecariu de l’Academia de la Llingua Asturiana (ALLA). Coincidiendo col Día de les Biblioteques la institución fai esta anuncia y l’entamu d’un proyeutu del académicu xixonés consistente na creación d’un repositoriu o archivu dixital de material históricu sobre la lliteratura asturiana de consulta pública.

La figura de responsable de la biblioteca taba nos estatutos de l’ALLA, en concretu nel artículu 26, pero nos sos 40 años d’historia nun se declarara encargáu nengún hasta agora. La norma marca qu’ha ser académicu o académica de númberu y correspondientes, coles funciones de “caltener y ordenar llibros, manuscritos y documentos de la institución”, “facilitar estos llibros, manuscritos o documentos, acordies coles normes que s’afiten nun Reglamentu específicu” y “dar cuenta en cada sesión de les nueves adquisiciones”.

Xosé Antón González Riaño, presidente de la institución, propunxo a Galán, académicu dende mayu, pa esti cargu, aprobándose’l so nomamientu na Xunta Ordinaria última. Aparéyase esta decisión col proyeutu presentáu nesi mesmu aconceyamientu pol xixonés pa tratar de llevar alantre'l que va ser el repositoriu o archivu dixital de la lliteratura asturiana, “un espaciu d'atropamientu en llinia de materiales históricos a disposición del públicu xeneral y de profesionales del ámbitu de la investigación llingüística y lliteraria”.

“Esti proyeutu quier da-y un mayor espardimientu a los trabayos enveredaos a la recuperación de testos históricos, a los que se van amestar, dixitalizaos, los materiales de la propia institución y del archivu personal del nuevu responsable de la biblioteca, asina como aquellos custodiaos por otres instituciones o particulares colos que se puedan llogar alcuerdos de collaboración”, esplica l’ALLA.

Pachu’l Peritu, el precedente

Galán conviértese asina nel primer bibliotecariu de la institución que, anque nunca contó con esta figura, sí la tuviera’l so precedente, la Real Academia d’Artes y Lletres, del 1919. Esti cargu ocupólu Francisco González Prieto, Pachu’l Peritu, que fora direutor y fundador del selmanariu xixonés n’asturianu ‘Ixuxú’ (1901).

Na semeya, Galán da'l so discursu al ser recibíu como académicu, nel uvieín Teatru Filarmónica nel XLIII Día de les Lletres Asturianes, baxo la mirada atenta de González Riaño.