L’ALLA destaca el “valir especialmente simbólicu” de la oficialización de la toponimia tradicional d’Uviéu

L’aprobación de la toponimia tradicional d’Uviéu, a falta entovía de la so espublización nel BOPA pa la so entrada en vigor, llevó a l’Academia de la Llingua Asturiana (ALLA) a felicitar al Gobiernu por esti pasu. “Tien un valir especialmente simbólicu” por ser el conceyu “onde s’asitia la capital del Principáu”, destacó.

“L’Academia de la Llingua Asturiana tresmite al Gobiernu del Principáu d’Asturies la so felicitación más candial pola aprobación, na xunta celebrada güei miércoles, del espediente toponímicu del Conceyu d’Uviéu (xunto colos de los conceyos de Cuaña y d’Onís), onde se da calter oficial a les sos formes toponímiques tradicionales”, comienza la nota institucional roblada ayeri pola institución académica. Nella tamién destaca’l determín tomáu pol gobiernu municipal del PSOE, Somos Uviéu y Izquierda Xunida de dar el preste a la propuesta de la Xunta Asesora de Toponimia sobre los nomes de llugar del conceyu nel Plenu del 18 d’abril.

Ésta afita que ‘Oviedo’ va pasar a tener la denominación billingüe ‘Oviedo/Uviéu’. Tamién va caltenese’l topónimu castellanu n’otros nomes de llugar, como ye’l casu de ‘Latores/Llatores’ o ‘Olloniegu/Lluniego’, mentes que La Manxoya ye ún de los que va adoptar namái la forma asturiana.

“Con estos tres espedientes aprobaos güei –por ayeri– son yá 64 los conceyos que ven oficializada la so toponimia tradicional, conformando estos procesos un pasu perimportante pa la normalización de la llingua asturiana. Sicasí, l’Academia entiende que tien un valir especialmente simbólicu’l fechu de dar el preste al espediente del Conceyu onde s’asitia la capital del Principáu y asina-y lo quier tresmitir al Gobiernu asturianu”, fina la nota.L’aprobación de la toponimia tradicional d’Uviéu, a falta entovía de la so espublización nel BOPA pa entrar en vigor, llevó a l’Academia de la Llingua Asturiana (ALLA) a felicitar al Gobiernu por esti pasu. “Tien un valir especialmente simbólicu” por ser “onde s’asitia la capital del Principáu”, destacó.

Na imaxe, vehículu del Conceyu col logu n'asturianu. Semeya obra de Víctor Suárez baxo llicencia CC BY-SA 4.0.