L'ALLA comunica los ganadores de los sos concursos del Certame d'Investigación

|
Carpeta y bolígrafu de l'ALLA

Yá se conocen tamién los finalistes de la Olimpiada Escolar de Redaición Urbano Rodríguez que se celebra'l día 21.

Ocho años depués l'Academia de la Llingua Asturiana (ALLA) tornó a convocar los sos concursos. Per un llau tán los del Certame d'Investigación y, per otru, los destinaos a escolines y escolinos.

Los diferentes xuraos convocaos pola institución académica decidieron conceder el Xosé Bolado de recoyida de material lliterario inédito anterior a 1970 a Adrián Martínez Expósito por 'Nel corazu de casina (1932-1934) de Fernán Coronas'; el de Documentalismu Sociocultural Curtiu a Pablo Cueto pa 'Indianos d’azucre'; y el de Recoyida, Trescripción y Estudiu de Testos Orales pa Claudia Elena Menéndez Fernández por 'Averamientu a la caracterización del asturianu de La Güeria Carrocera (Samartín del Rei Aurelio)', que tamién recibe un premiu especial.

Mentes, nel de Recoyida de Material Toponímico Oral danse dos accésits pa los trabayos 'Toponimia de la parroquia de Peñaflor (Grau)', de Xabiel Fernández García, y 'Toponimia menor de la parroquia de Caldueñu (Llanes)', de Lena Valladares; y nel de Propuestes de Terminoloxía Especializada otru pa 'TermAst: Videoxuegos', de Víctor Suárez. Toos van recibir el so reconocimientu'l día 21 nel llar social de l'ALLA.

Clasificaos pa la final

Les escolines y escolinos clasificaos pa la final de la Olimpiada Escolar de Redaición Urbano Rodríguez, que tamién se va celebrar el día 21 na sede académica, son, en Primaria, Fabián Montes, Gadea Iglesias, Valeria Riestra y Adrián González Pida, del CP Martimporra (Bimenes); y Daniela González Villota y Diego Menéndez Fernández, del CP San Claudio de San Cloyo (Uviéu); y en Secundaria y Bachilleratu, Xulia Antuña, Lucía Doce, Alberto Antuña y Vidal Quidiello, del IES Santa Bárbara de La Felguera (Llangréu); Naira Suárez Sánchez y Favila Velasco, del IES Peñamayor de Nava; Nerea Menéndez Martínez y Carla Bote, del IES Pravia; y Álvaro Ordóñez, del CPEB Cabañaquinta de Cabanaquinta (Ayer).

 

Contador Estadistiques