L’ALLA celebra’l “Día das lletras Asturianas” nel Navia-Eo

P'atender el cultivu y la promoción del gallego-asturiano, a nosa fala, la secretaría del Navia-Eo de l'Academia de la Llingua Asturiana celebra esti sábadu'l Día das Lletras Asturianas en collaboración cola asociación cultural Xeira. L'actu va facese'l sábadu 21 de mayu n'A Roda (Tapia), nel Centro d'Instrucción y Recreo, a les 21:00 hores, y nelli va presentase'l llibru infantil ¡Esta é a mía casa!, traducción al gallego- asturiano del cuentu d'Enrique Carballeira Melendi publicáu primero n'asturianu dientro de la coleición «Escolín» y qu'agora fai'l númberu 8 de la coleición «Os llibros d'Entrambasauguas» na so versión na fala.

La segunda parte del actu va tar centrada nel recuerdu al escritor tapiegu Jacinto Díaz López, muertu'l branu pasáu, autor con Manuel García-Galano d'un vocabulariu del so llugar de nacencia, A Roda. Autor tamién del llibru Ditos, refráis y outras cousas (1993), publicó delles collaboraciones en gallego-asturianu na revista Entrambasauguas.