L’ALLA caltién una partida de 40.000 euros nos PXE del 2022, entá lloñe de lo que reciben el restu d’academies

El proyeutu de Presupuestos Xenerales del Estáu (PXE) incorpora per primer vez una partida pa l’Academia de la Llingua Asturiana (ALLA) depués de que nes cuentes actuales llegara financiación a la institución al traviés d’una enmienda presentada pol PSOE y Xuníes Podemos. Sicasí, sigue siendo de 40.000 euros polos 311.380 euros pa la Real Academia Galega y l’Institut d’Estudis Catalans.

Son, poro, les mesmes cifres que recibieron esti 2021 toles academies de les llingües del Estáu, a la qu’hai que sumar Euskaltzaindia, que recibe 220.000 euros, y la Real Academia Española, que lleva la cantidá mayor, 6.827.420 euros. Mentes, la Comisión Permanente de la Asociación de Academias de la Lengua Española cuenta con una partida de 83.650 euros.

Iniciativa pol Asturianu, organización que per años tuvo aconceyando con diputaos y senadores asturianos en Madrid p’algamar una dotación económica pa l’ALLA, lo que se consiguió l'añu pasáu gracies al movimientu del PSOE y de Xuníes Podemos, reclama’l so crecimientu “hasta equiparala col restu d'academies del Estáu”, recordando que la gallega recibe siete veces más de dineru. “Agora que la financiación estatal pa l'ALLA ta afitada nos PXE ye’l momentu d’avanzar nel camín de la igualdá del asturianu col restu de llingües d’España”, apuntó.

Incidiendo nel casu gallegu, rescampla que foi’l PP “l’encargáu de llevar la respectiva reclamación sobre la financiación de la so institución de la llingua propia, ello ye, la Real Academia Gallega”, polo que reclama “a tolos partíos con representación parlamentaria reclamar esta subida”.

Na semeya, Plenu del Congresu nel que se valtaron el miércoles toles enmiendes a la totalidá al proyetu de PXE.