L’ALLA califica de “anomalía democrática” lo asocedío con Piñán na Xunta Xeneral

La negativa a que Berta Piñán emplegara l’asturianu na Xunta Xeneral xeneró numberoses reaiciones. L’ALLA calificó de “anomalía democrática” el fechu, mentes que’l presidente Barbón unvió-y a la conseyera el so apoyu frente a l’aición de la “derecha estrema”.

“Con gran esmolición, l’Academia de la Llingua Asturiana (ALLA) siguió nel día de güei –por ayeri– la negativa parllamentaria a que la Conseyera de Cultura, Política Llingüística y Turismu exerciere’l so derechu a emplegar institucionalmente la so llingua patrimonial, basándose nuna interpretación forciada del reglamentu, según la que namás los diputaos tendríen el derechu a espresase n’asturianu. Y ye que, como dalgunos intervinientes na sesión afitaron, la llingua asturiana yá s’usare anteriormente n’abondes comparecencies de carauterístiques mui asemeyaes y nel mesmu llugar”, comenzaba’l comunicáu asoleyáu pola institución, a la que-y abultaba “llamentable (y hasta escandoloso) que se refugue d’esti mou qu’una representante del Gobiernu d’Asturies faiga usu de la so llibertá llingüística nuna comparecencia parllamentaria”.

Nesi sen, entiende como grave “que la xida pa ello seya una hipotética imposibilidá d’entendimientu, argumentu tramposu que rescampla na so estratexa de llevantar muries au nun les hai, intentando xenerar un conflictu que nun se da na sociedá asturiana pa ganar asina’l protagonismu mediáticu”. Poro llama al camudamientu “inmediatu” del reglamentu de la Xunta Xeneral si torga l’usu “de la llingua héstorica d’Asturies en parllamentu”.

L’ALLA tresllada a Piñán “el nuesu encontu a les propuestes d’actuación llingüística presentaes güei y la nuesa más fonda solidaridá como institución tutelar de los derechos llingüísticos del pueblu asturianu énte una situación que constitúi un verdaderu ataque al exerciciu d’ún de los derechos humanos más básicos y universalmente protexíos: el d’emplegar la propia llingua”. Por último, reclama la declaración de la cooficialidá “como única midida pa garantizar la llibertá llingüística y facer dafechu efeutivu’l derechu a emplegar la llingua asturiana per parte de toa persona que lo escueya llibremente”.

El presidente del país, Adrián Barbón, tamién tuvo pallabres d’apoyu pa la conseyera tres conocer los fechos acontecíos na Sala Constitución de la Xunta Xeneral mientres la Comisión de Cultura, Política Llingüística y Turismu.

Todo mi apoyo a la consejera Berta Piñán a la que hoy la extrema derecha ha impedido hablar en asturiano en la Junta General del Principado, el parlamento de Asturias.

— Adrián Barbón (@AdrianBarbon) October 1, 2019

Insisto. Toda mi solidaridad y apoyo a Berta Piñán, Consejera del Gobierno de Asturias. Diputados y diputadas del bloque de la involución le han impedido hoy intervenir en asturiano en la Junta General, el Parlamento de Asturias. La derecha sigue el juego a la extrema derecha. https://t.co/rCTenr4U77

— Adrián Barbón (@AdrianBarbon) October 1, 2019

Esixencia de modificación del reglamentu

Iniciativa pol Asturianu definió la situación como un “ataque indecente a la llibertá d’usu del asturianu y a la propia llingua asturiana, pero mui n’especial a los drechos de los sos falantes, que supón la prohibición del usu del idioma a la conseyera Berta Piñán na máxima institución d’Asturies. Condergamos les postures más reaccionaries contra la llingua asturiana”, en pallabres d’Iván Llera. El presidente d’esti coleutivu esixe una modificación urxente del reglamentu de la Xunta Xeneral y recuerda qu’esti casu “demuestra cómo la oficialidá ye l’únicu camín posible pa reconocer los drechos de los ciudadanos y ciudadanes d’Asturies a la hora d’usar l’asturianu”.

Defeutu democráticu grave

El Sindicatu Unitariu y Autónomu de Trabayadores de la Enseñanza d’Asturies (SUATEA) aseguró que “la decisión de la mesa y la presidenta torgando l’usu del asturianu a una integrante del Gobiernu asturianu nuna comparecencia parlamentaria fai rescamplar y amplifica los efectos del grave defeutu democráticu que supón la segregación llingüística a la que mos vemos sometíos los ciudadanos y ciudadanes d’Asturies cuando queremos facer efectivos los nuestros derechos llingüisticos”. La organización, que calificó de “discriminación, represión y humildación” lo que vivió ayeri Piñán, esixe “camudar los reglamentos de la cámara, facer efectivos los derechos recoyíos na Llei d’Usu y reconocer la cooficialidá de la llingua asturiana y el gallego asturiano”.

“D’aquellos vientos, estes turbonaes”

Andecha Astur tamién asoleyó un comunicáu nel que recuerda que “d’aquellos vientos, estes turbonaes”, culpando al PSOE “de la política de repreesión llingüística que güei –por ayeri– careció Piñán na Xunta”. “Reclamamos, por supuestu, el drechu de Berta Piñán y de cualisquier otru asturianu/a a espresase na propia llingua, na Xunta y fuera d’ella, pero nun podemos escaecer que la represión de los asturfalantes foi fasta hai bien pocu parte del programa y de la política de los socialistes asturianos, que se vieron forciaos a camudar la so postura por mor de la presión ciudadana a favor de la oficialidá”, aseguró la formación nacionalista.