L’alcuerdu ente Podemos y la FSA namái suma 70.000 euros a la promoción del asturianu

|
Alcuerdu FSA y Podemos presupuestos 2019

Nun se desendolca l'alcuerdu d'investidura con Izquierda Xunida (IX) nin la Llei d'Usu y Promoción del Bable/Asturianu. Tampoco hai financiación pal idioma na Educación na etapa 3-6 años.

L’aumentu de la partida pa la promoción del asturianu, que supón el 0,04 por cientu del presupuesto total, ye bien curtia al quedar ésta en 1.703.630 euros. El proyeutu anterior, que nun salió alantre al nun haber alcuerdu ente la Federación Socialista Asturiana (FSA) y Podemos, destinaba 1.677.000 euros a la normalización, 93.377 euros más que nes cuentes del 2017 que se prorrogaron pa esti 2018.

A los 1,7 millones pal idioma, qu'inclúin la educación, súmense 70.000 euros pa la TPA, tamién previstos nel proyeutu de presupuestos anterior, que se van destinar previsiblemente al doblaxe de películes y series infantiles. Trátase del únicu puntu sobre l’asturianu del alcuerdu dobláu ayeri ente Podemos y la FSA, consideráu “curtiu y mísere” pola Xunta pola Defensa de la Llingua Asturiana nun comunicáu onde critica que “dar perres a una cadena pública pa qu'emita n'asturianu ye actuar como si ésta se tratara d'un mediu priváu: ye dar por fechu que TPA y RPA son cadenes en castellanu y que pa facer daqué n'asturianu hai que poner dineru dende fuera”.

Nun se desendolca l'alcuerdu d’investidura nin la Llei d'Usu

FSA y Izquierda Xunida (IX) roblaron al principiu de llexislatura un alcuerdu d’investidura nel qu’había espaciu pal asturianu. Los 5 parllamentarios de la coalición permitía sumar a Javier Fernández 19 votos, superando asina a les fuercies de derecha, que llegaben a 17.

Los trés puntos qu’incorporaba dichu alcuerdu yeren “ameyoraráse la Llei d’Usu y Promoción del Bable/Asturiano col oxetu de refociar la so implantación, normalización y utilización nes Alministraciones, la publicidá institucional, los medios de comunicación, l’ámbito educativu y l’editorial”; “refociaráse’l nivel institucional de la política llingüística”; y “ameyoraráse la financiación de l’Academia de la Llingua Asturiana”, amás de la creación de la Comisión Especial d’Estudiu sobre'l Réxime de Proteición y Promoción del Asturianu qu’acabó presidiendo Concha Masa.

Nel tramu final yá de la llexislatura, nel que yá se pue dicir que la normalización del asturianu quedó pa prau, les más d’estes midíes nun se cumplieron, nin tampoco otru de los pocos compromisos del PSOE col asturianu, la xeneralización de la ufierta de la llingua asturiana nel periodu educativu ente los 3 y los 6 años, daqué a lo qu'obliga la Llei d'Usu y que lleva años incumpliéndose.

Contador Estadistiques