L'albergue del Meicín vuelve a l'actualidá

El Colectivu Montañeru denuncia que la Conseyería de Cultura, dempués de que se rechazare'l primer proyectu na CUOTA, quier presentar otru qu'implica una mayor superficie construyida

El culebrón del Meicín vuelve otra vegada al primer planu de la polémica.

Dende va dos años, la Conseyería de Cultura ta intentando sacar alantre un albergue de montaña na Vega del Meicín, na fastera del macizu de les Ubiñes, en Conceyu L.lena. La obra llegó a licitase n'abril del 2002, pero en mayu quedó anulada por incumplir delles normes mediuambientales y nun presentar estudiu d'impactu. Asina foi que en xunu d'esi mesmu añu la tramitación del edificiu entamó otra vuelta partiendo dende cero, pero una nueva alxudicación n'ochobre del 2.002 volvió a anulase tamién por incumplimientu de normes mediuambientales. Enantes d'acabar el 2002, la obra salió a licitación por tercer ocasión, yera'l 2 d'avientu, pero de la tercera tampoco nun diba dir, y el mesmu día 13 anulábase otra vegada.

Un añu dempués, l'albergue del Meicín paecía que quedare pa prau, pero'l 16 d'ochobre del 2.003 volvía a falase del refuxu de montaña, que salía a licitación por cuarta ocasión el 6 de payares.

La obra llegó a alxudicase a la empresa Ibersilva, pero les alegaciones de grupos ecoloxistes y montañeros yá apuntaben lo que dempués diba sancionar la Comisión d'Urbanismu y Territoriu del Principáu: el proyectu que se presenta nun cumple con delles normes d'ordenación urbana, sobremanera cola de l'altura, y ye que l'edificiu que se cuenta con poner ye de trés pisos. Ello y el dictame del Estudiu d'Impactu Ambiental, que califica de "severu" l'efectu del edificiu na vega, llevó a la CUOTA a dar un informe negativu que cayó como una llábana en proyectu.

Yá d'aquella se dixo que se buscaríen alternatives, y ello ye qu'agora'l departamentu que dirixe Ana Rosa Migoya va presentar p'agostu un nuevu proyectu nel que s'igua la pega de l'altura. El Colectivu Montañeru Pola Defensa de los Picos d'Europa denuncia qu'a cambiu d'ello'l proyectu presenta un desarrollu en planta mayor, colo que la superficie a construyir ye más grande. El colectivu de defensa del mediu ambiente que dirixe Avelino Cárcaba llamenta que la Conseyería anecie en facer una gran obra d'estes característiques nun lugar como'l Meicín y recuerda que contra'l proytectu anterior presentárense más de mil alegaciones.

El Colectivu Montañeru sorraya'l fechu de que incluso sectores del PSOE protestaron contra'l proyectu y destaca que nun ye preciso facer esta infraestructura, defendiendo, como yá ficiere enantes, que de facese un albergue, esti se construya en pueblu de Tuiza Riba, a mui poca distancia del Meicín. Al paecer de los conservacionistes, esta alternativa daría-y vida a un pueblu que d'otra manera queda ermu pelos iviernos y amenorgaría l'impactu visual y estructural de la obra a facer.

D'otra manera, los ecoloxistes entrúguense por qué l'alministración nun entra a valorar posibles alternatives y anecia en llevar la obra hasta la mesma fastera de les Ubiñes, espaciu yá protexíu y que se pretende elevar a la categoría de Parque Natural.