L'agua dañó enforma a dellos conceyos

La nueche del sábadu, Asturies rexistró una de les mayores tormentes del añu. Dellos conceyos sofrieron bien de daños pola tromba d'agua, qu'inundó los suétanos y baxos en dellos llugares. Venti pueblos quedaron incomunicaos y delles carreteres quedaron cortaes polos argayos. Grau foi'l conceyu onde más dañu fizo l'agua, mientres en Valdés, que quedó ensin corriente durante trés hores, l'Ayuntamientu despertó a los vecinos con megafonía pa que retiraren los sos coches de la oriella del ríu, qu'amenazaba con llevalos per delantre. Los ríos más importantes, casu del Nalón y del Narcea punxéronse en niveles mui altos, amenazando con desbordase.

La tormenta dexó dos víctimes nes persones d'un matrimoniu de la braña Buscabreiru, en conceyu Salas, que morrieron al quedar la casa en que vivíen enterrada por culpa d'un argayu de tierra del Picu Aguichón. la braña ye parte de la parroquia de L.laviu, onde los más de los vecinos son antiguos vaqueiros que dexaron la treshumancia va tiempu y que viven en cases que nun cumplen colos mínimos de seguranza.

El presidente del Gobiernu asturianu y el consejero de Xusticia tan acabante d'anunciar na inauguración del Conseyu Xeneral de la Emigración qu'estudien compensar polo menos parte de los daños del temporal