L’agricultura ecolóxico nun prende n’Asturies

Anque la superficie que se-yos dedica a estos cultivos llegó nel 2004ª les 2.600 hectárees, Asturies pinta mui poco dientro d'un negociu que mueve n'España más de 250 millones d'euros al añu.

Según los datos oficiales del Ministeriu d'Agricultura, nel rexistru de la producción agrícola ecolóxico tan daos d'alta namás que 91 productores y 37 ellaboradores de productos rellacionaos cola agricultura "verde" que nun emplega pesticides nin abonos d'aniciu químicu. Ente los 91 productores asturianos faen una superficie total dedicao a estos cultivos de 2.694 hectárees.

Estos datos dexen a Asturies a la cola del Estáu español, que tien un total de 733.182 hectárees dedicaes a esti tipu de producciones de calidá y altu valor añadíu y a un total de 16.013 productores daos d'alta nos respectivos rexistros autonómicos. De fechu, namá Cantabria y Madrid queden tres d'Asturies en númberu de productores y superficie dedicao a agricultura ecolóxico. Extremadura y Andalucía capitalicen la producción agrícola d'esta triba, mientres que Cataluña ye la comunidá onde hai más ellaboradores que trabayen con materia prima "verde".

Asturies solo representa'l 0,37% del total de l'agricultura ecolóxico n'España, y amás trátase d'una producción mui especializada, dedicándose 2.571 de les poco menos de 2.700 hectárees ecolóxiques de les que disponemos a la producción de pación pal ganao. Con too y con ello, les cifres actuales d'Asturies meyoren, los datos de los últimos años, y ye que nel añu 2002, por exemplu, namás s'alcontraben en rexistru que 42 productores, prácticamente la metada de los qu'hai agora.