L’aeropuertu de Ranón gana destinos

La otra selmana'l Gobiernu asturianu y la compañía Air Nostrum roblaben un alcuerdu pol que la compañía aerea diba poner serviciu con Bruseles, Sevilla, Alicante, valencia y Mallorca. Con ello l'aeropuertu d'Asturies ganaba n'ufierta de destinos hasta convertise nun de los diez d'España con más destinos directos, pero seguía ensin ganar la guerra de los precios.

Air Nostrum , que va a poner estos nuevos vuelos dende'l 30 d'ochobre, parte de precios de 226 euros pa los vuelos cola capital Europea y de 72 euros pa los destinos n'España, una barrera de precios mui penriba de los que ponen otres compañíes como RyanAir o Easyjet, les que se conocen como compañíes de "vuelos baratos" y que yá trabayen dende aeropuertos allegaos al nuestru.

Una negociación de la Cámara de Comerciu d'Uviéu con una d'estes dos cases d'aviación pue permitir qu'Asturies tenga vuelos por menos de trenta euros con Alemaña y con Inglaterra, dos importantes destinos y, entovía más, dos importantes procedencies que puen apurrir bien de turistes al país, o polo menos nello s'enfoten los promotores del proyectu pa enxertar Asturies na rede de los "vuelos baratos".

Hasta agora, Ryanair opera dende l'aeropuertu de Valladolid, onde tien llinia regular con Bruseles y Llonfres, mientres que Easyjet caltién dende Bilbao trés llinies colos aeropuertos inglesos de Bristol, y Gatwick y Stansted (Llondres)