Lada va tener otru grupu de carbón

La eléctrica Iberdrola anunció que va invertir, nuna primer fase, 5 millones d'euros n'encuriosar les instalaciones de los grupos térmicos que tien en Lada (Llangréu), según dixeron representantes del SOMA-FIA-UXT depués d'entrevistase con responsables de la eléctrica. Esta inversión, que va enenchase en dellos plazos más hasta facer un total de 64 millones d'euros, va valir pa espurrir la vida útil del grupu 4 térmica del Nalón adaptándolu a les nueves normatives d'emisiones contaminantes de la UE, qu'esixen ente otros equipamientos, una desulfuradora de gases. Pela so parte, el grupu III de la térmica, qu'arrecostina con 36 años de funcionamientu, nun va tener prórroga posible, colo que va tener que pesllar definitivo.

Sicasí, los directivos de la eléctrica reconocieron por fín que tienen n'estudiu un grupu térmicu nuevu de 550 mw pa Lada. Esti grupu, Lada 5, de ser sedría de carbón y bien podría asitiase nel solar de Nitrastur, un tarrén qu'atiesta cola térmica actual y que l'añu pasáu mercó en subasta pública la eléctrica puyando por ellos el triple que l'Ayuntamientu, que contaba con destinalos a vivienda y equipamientos urbanos.