L´Acesol Voley, más averáu al descensu

L´alcuentru vieno precedíu polo asocedío a lo llargo la selmana cola posible suspensión del mesmu pola orde de la Federación Española de Voleibol por mor de les deldes del conxuntu fabril colos árbitrios. A lo cabero les xestiones feches polos dirigentes del Acesol Voley foron efeutives y diéron-yos a les fabriles un plazu másimu de diez díes pa pagar la delda, que ye de 6.000 euros.

llamentáblemente, no deportivo nun hebo igua y l´Acesol Voley sumó una nueva derrota que dexal'equipu na so agónica llucha pola permanencia cuando falten cuatro xornaes pa finar la lliga regular. El conxuntu xixonés tuvo nel descensu directu en dellos momentos de la tarde del sábadu en cuantes qu'el Ciudad de Las Palmas, el so rival cimeru pola permanencia, llegó a ganar por 0-2 na so visita al Cajasur Córdoba. La victoria de les canaries yera'l descensu matemáticu del conxuntu de Ricardo Frugoni, pero la reacción nos puntos finales del tercer set del equipu cordobés dió-yos la victoria y la salvación matemática na Superlliga Femenina a les andaluces.


Respective al partíu de les asturianes, el contrariu yera'l C. V. Albacete, que se presentó nel Palacio los Deportes de la Guía tres llograr el tercer puestu na Copa S. M. La Reina. El primer set ganólu l'equipu manchegu con un 10-25, sofitando la victoria gracies a un parcial de 0-7, pasando de 5-9 a 5-15. Nesta parte l'alcuentru rellumaron Natalia Ronanmova y Milagros Roy.

El segundu set entamó de la mesma mena cola que finó'l primeru. Salida perfuerte del equipu de José Manuel González con un parcial de 0-5. L´Acesol reaccionó poniéndose a un puntu (9-10), pero dos parciales foriatos de 0-4, ficieron un furacu nel lletrónicu de de 10-18, gracies al bon facer de María José Garrido, xunto con Encarnación García, que nun xugarán nel primer set. Esa separtación foi bastante pal C. V. Albacete y finar ganando'l set por 19-25.


El tercer set foi`l más equilibráu ya igualáu de tol alcuentru y onde l'Acesol intentó ufrir resistencia al poderío manchegu. Les coses nun emprimaron bien pa les xixoneses, pues l´equipu foriatu adelantóse con un 0-3, llegando a separtase hasta un 2-7. Dende esi momentu l´Acesol tornó'l marcador, gracies a un 6-0, pasando a un 8-7. Esto debióse mayormente al aciertu ofensivu de Vita Prychepa. La igualdá caltúvose con mínimes ventayes foriates de dos tantos hasta que dos aiciones siguíes de Janesca Scharnovski igualaron el partíu a 20. Nel C. V. Albacete les anotaciones yeren cosa de María José Garrido, con un 21-22. Pero un remate fuera de Daniela Da Silva, que foi la xugada clave del set, dexó-y dos puntos de ventaya (21-23). Vita Prychepa averó al Acesol a un puntu (22-23), pero un remate fuera d'Estefanía Sangiao, xunto con un erru na recepción fabril diéron-y el trunfu al equipu foriatu nel set, por 22-25, y nel partíu.


La meyor xugadora del alcuentru foi María José Garrido del
C. V. Albacete, amás de ser la másima anotadora con 15 puntos. Tamién hai de destacar a la peruana Milagros Moy y a la rusa Natalia Romanota. Amás rellumaron nesti equipu Encarnación García y la venezolana Daniela Patiño, antigua xugadora del Acesol. Nel equipu local destacar el xuegu desendolcáu pola ucraniana Vita Prychepa.


El prósimu sábadu l'Acesol Voley xuega un partíu trescendental escontra'l Ciudad de Las Palmas na so pista. Casu de nun ganar l'equipu astrianu va baxar automáticamente de categoría. Pa poner la cosa más gafa, ye posible que l'Acesolnun puea contar cola colocadora Maryeling Araújo, que güei nun xugó por mancadura.

Alliniaciones:

ACESOL VOLEY LA CALZADA : Vita Prychepa, Barbara Rodríguez, Marija Zoric, Janesca Scharnovski, Daniela da Silva y Estafania Sangiao. Tamién xugaron: Noelia Sánchez, Noelia Franco y Cristina Pardo (llíberu).

C.V. ALBACETE : Milagros Moy, Natalia Romanota, Daniela Patiño, Diana Sánchez, Marras y Amaranta Fernández. Tamién xugaron: Diana Castaño (llíberu), Patricia González, Belén Simancas, María José Garrido y Encarnación García.